बेळगाव लाईव्ह :
कंग्राळी खुर्द येथील सरकारी उच्च प्राथमिक मराठी शाळेच्या शतकोत्तर महोत्सवानिमित्त आयोजित करण्यात आलेल्या माजी विद्यार्थ्यांच्या स्नेहमेळाव्यात जुन्या आठवणींना उजाळा मिTळत भावनांचा अनोखा संगम अनुभवायला मिळाला. अनेक वर्षांनंतर एकत्र आलेल्या माजी विद्यार्थ्यांनी शाळेच्या आठवणींना उजाळा देत बालपण पुन्हा एकदा जगल्याची भावना व्यक्त केली.
रविवारी सकाळपासूनच शाळेच्या परिसरात माजी विद्यार्थ्यांची गर्दी होत होती. शाळेचे वर्ग, मैदान, परिसर आणि जुन्या आठवणी पाहून अनेकांच्या भावना अनावर झाल्या. काळाच्या ओघात बदललेले चेहरे आणि वाढलेले वय यामागे मात्र बालपणीची मैत्री तशीच कायम असल्याचे चित्र पाहायला मिळाले. अनेक जणांनी एकमेकांना ओळखत गळाभेट घेत जुन्या आठवणींना उजाळा दिला.
या स्नेहमेळाव्यात विविध क्षेत्रांत कार्यरत असलेले तसेच निवृत्तीनंतरचे जीवन जगणारे माजी विद्यार्थी सहभागी झाले होते. शाळेतील शिक्षण, शिक्षकांचे मार्गदर्शन आणि बालपणीच्या खोडकर आठवणींना उजाळा देताना अनेकांच्या डोळ्यांत आनंदाश्रू तरळले. काहींनी आपल्या यशस्वी वाटचालीमागे शाळेने दिलेल्या संस्कारांचा मोठा वाटा असल्याचे सांगितले.
शाळेने दिलेली शिक्षणाची भक्कम पायाभरणी, जीवनमूल्ये आणि स्वप्नांना मिळालेली दिशा याबद्दल माजी विद्यार्थ्यांनी कृतज्ञता व्यक्त केली. आज विविध क्षेत्रांत यश मिळवलेल्या विद्यार्थ्यांनी आपल्या यशाचे श्रेय शाळेला आणि शिक्षकांना दिले.
स्नेहमेळाव्याच्या माध्यमातून अनेक वर्षांपासून तुटलेले संपर्क पुन्हा प्रस्थापित झाले. जुन्या मित्रमंडळींशी झालेल्या भेटीगाठींमुळे वातावरण भावनिक झाले होते. कार्यक्रमाच्या शेवटी निरोप घेताना पुन्हा अशाच प्रकारे भेटण्याचा निर्धार अनेकांनी व्यक्त केला.
कंग्राळी खुर्द शाळेच्या शतकोत्तर महोत्सवानिमित्त आयोजित या स्नेहमेळाव्याने केवळ माजी विद्यार्थ्यांना एकत्र आणले नाही, तर त्यांच्या मनात दडलेले बालपण पुन्हा एकदा जागवले. शाळेशी असलेली भावनिक नाळ आणि मैत्रीचे अतूट बंध यांचे दर्शन या कार्यक्रमातून घडले.
