बेळगाव लाईव्ह : बेळगाव शहरात १७ मे रोजी होणाऱ्या ‘स्वच्छ बेळगाव’ या भव्य सोहळ्याला जिल्हा प्रशासनाने परवानगी नाकारल्याने मोठा पेच निर्माण झाला आहे.
जिल्हा प्रशासनाच्या आदेशानंतर बेळगाव महापालिकेने तातडीने हालचाली करत संपूर्ण शहरातील अनधिकृत बॅनर आणि फ्लेक्स हटवण्याची मोहीम राबवली. या कारवाईमुळे शिवम असोसिएट्सच्या वतीने आयोजित या कार्यक्रमाला आता कायदेशीर अडचणींचा सामना करावा लागत आहे.
सरदार्स मैदानावर आयोजित या स्वच्छता अभियानासाठी आयोजकांनी मोठी तयारी केली होती. मात्र, सुरक्षा नियमांचे उल्लंघन आणि प्रशासकीय परवानगीची कमतरता असल्याचे कारण देत जिल्हा प्रशासनाने या मेळाव्याला मज्जाव केला आहे.
महापालिका आयुक्त कार्तिक एम. यांनी स्पष्ट केले की, शहरात लावण्यात आलेल्या बॅनरवर पालिकेचा अधिकृत नोंदणी क्रमांक नव्हता. “शहराच्या सौंदर्याला बाधा आणणारे कोणतेही कृत्य खपवून घेतले जाणार नाही,” असे म्हणत त्यांनी नियम मोडणाऱ्यांवर कठोर कारवाईचा इशारा दिला आहे.
दरम्यान, या संपूर्ण प्रकरणावर आयोजक अभिलाष यांनी आपली बाजू मांडताना प्रशासनावर गंभीर आरोप केले आहेत. महापालिका आयुक्तांनी सुरुवातीला या सामाजिक कार्यासाठी तोंडी संमती दिली होती, मात्र आता जाणीवपूर्वक बॅनर हटवले जात असल्याचा दावा त्यांनी केला आहे.
या कारवाईमागे राजकीय दबाव असण्याची शक्यता वर्तवत, “प्रशासनाने कितीही अडथळे आणले तरी आम्ही नियोजित कार्यक्रम करणारच,” असा ठाम निर्धार आयोजकांनी व्यक्त केला आहे.
दुसरीकडे, हा एक खाजगी उपक्रम असल्याने महापालिका त्याला सहकार्य करू शकत नाही, असे प्रशासनाकडून आधीच कळवण्यात आले होते. अधिकृत परवानगीशिवाय मोठ्या प्रमाणात गर्दी जमवणे धोक्याचे ठरू शकते, या कारणास्तव ही कारवाई करण्यात आली आहे.
महापालिकेच्या या भूमिकेमुळे आता आयोजक आणि प्रशासन यांच्यातील संघर्ष अधिकच चिघळण्याची चिन्हे दिसत आहेत.
