बेळगाव लाईव्ह : डॉ. बाबासाहेब आंबेडकर व हरितक्रांतीचे प्रणेते डॉ. बाबू जगजीवनराम यांच्या ३९ व्या जयंतीनिमित्त जिल्हाधिकारी मोहम्मद रोशन यांच्या अध्यक्षतेखाली बेळगाव जिल्हा पंचायत कार्यालयात आढावा बैठक पार पडली.
बेळगाव जिल्हा पंचायत कार्यालयात आज डॉ. बाबासाहेब आंबेडकर आणि डॉ. बाबू जगजीवनराम यांच्या ३९ व्या जयंतीनिमित्त तयारीच्या अनुषंगाने आढावा बैठक घेण्यात आली. या बैठकीत कार्यक्रम शांततेत आणि सुव्यवस्थेने पार पडावा यासाठी सुरक्षेच्या उपाययोजना, आयोजनाच्या बाबी आणि इतर आवश्यक गोष्टींचा आढावा घेण्यात आला.
जिल्हा प्रशासनाने सर्व संबंधित अधिकाऱ्यांना योग्य त्या सूचना देत जयंती उत्सव शांततामय आणि भव्य स्वरूपात पार पाडण्याचे निर्देश दिले. जयंती दिनी सकाळी १० वाजता आंबेडकर उद्यानात डॉ. बाबासाहेब आंबेडकर यांच्या पुतळ्याला पुष्पहार अर्पण करून अभिवादन करण्यात येईल. त्यानंतर धर्मवीर संभाजी चौकातून मिरवणूक काढण्यात येणार आहे.
मुख्य व्यासपीठावरील कार्यक्रम सायंकाळी ४ वाजता होईल. महानगरपालिकेकडून मिरवणुकीसाठी बॅनर, कटआउट, स्वच्छता आणि तात्पुरत्या शौचालयांची व्यवस्था करण्यात येणार आहे. तसेच, मिरवणूक काढण्यात येईल.
या कार्यक्रमात अधिकाधिक लोकांचा सहभाग होण्यासाठी जिल्हा प्रशासनाने सर्व सरकारी कार्यालयांमध्ये डॉ. बाबासाहेब आंबेडकर यांच्या प्रतिमेला अभिवादन करण्याचे आदेश दिले आहेत. सुरक्षा व्यवस्था मजबूत करण्यासाठी पोलिस दलाकडून कठोर बंदोबस्त ठेवला जाणार आहे.
तसेच, आरोग्य सुविधा, रुग्णवाहिका आणि स्वच्छ पिण्याचे पाणी यांचीही व्यवस्था करण्यात येणार आहे. या बैठकीस जिल्हा पोलिस अधीक्षक डॉ. भीमाशंकर गुळेद, जिल्हा पंचायत सीईओ राहुल शिंदे, महापालिका आयुक्त शुभा बी., समाजकल्याण विभागाचे अधिकारी आणि आंबेडकर चळवळीतील अनेक नेते उपस्थित होते.
