बेळगाव लाईव्ह:भारतीय संरक्षण सेवेतील निवृत्त कर्मचारी चन्नम्मानगर, बेळगाव येथील 72 वर्षीय ज्येष्ठ क्रीडापटू एस. एल. देवरमणी यांनी स्वीडनमधील गोटेनबर्ग येथे गेल्या 13 ते 25 ऑगस्ट 2024 या कालावधीत पार पडलेल्या प्रतिष्ठेच्या जागतिक मास्टर्स ॲथलेटिक चॅम्पियनशिपमध्ये भारताचे प्रतिनिधित्व करून उत्तम कामगिरी नोंदविली.
स्वीडन मधील जागतिक मास्टर्स ॲथलेटिक चॅम्पियनशिपमध्ये जगभरातील 117 देशातील 8000 खेळाडूंनी भाग घेतला होता. त्यामध्ये भारताच्या एस. एल. देवरमणी यांनी 70 वर्षावरील पुरुष गटाच्या 10 कि.मी. रोड रेस, 5000 मी. धावणे, 5000 मी. चालणे आणि 4×400 मी रिले शर्यतीत भाग घेऊन पुढील प्रमाणे यश मिळविले.
1) 10 कि.मी. रोड रेस : वेळ -1:02:26, स्थान -33वे. 2) 5000 मी. धावणे : वेळ -29:31.10, स्थान -29वे. 3) 5000 मी. चालणे : वेळ -43:00:00, स्थान -20वे. 4) 4×400 मी. (65 वर्षावरील पुरुष) : वेळ -5:36.19, स्थान -8वे. सदर कामगिरी लक्षात घेऊन एस. एल. देवरमणी यांची आता सिंगापूर आणि मलेशिया येथे येत्या 22 ते 30 सप्टेंबर या कालावधीत होणाऱ्या एसबीकेएफ दहावी आंतरराष्ट्रीय खेळ 2024 (इंटरनॅशनल गेम्स 2024) या क्रीडा महोत्सवासाठी भारतीय संघात निवड झाली आहे निवड झाली आहे.
बेळगावच्या ॲथलेटिक्स जगतातील एक आदरणीय व्यक्तिमत्व असलेले देवरमणी हे भारतीय सेनादलाचे सेवानिवृत्त कर्मचारी आहेत. स्थानिक आणि परगावच्या देशांतर्गत स्पर्धांसह नेपाळ, श्रीलंका, दुबई वगैरे परदेशातील आंतरराष्ट्रीय स्पर्धांमध्ये सहभाग दर्शविणाऱ्या 75 वर्षीय एस. एल. देवरमणी यांनी कॉलेज जीवनापासून
आजतागायत सुमारे धावण्याच्या शर्यतीत 400 पदके आणि असंख्य बक्षिसे मिळवली आहेत. चन्नम्मानगर येथे त्यांचे स्वतःचे छोटे किराणा दुकान आहे. जागतिक मास्टर्स स्पर्धेतील यशाबद्दल देवरमणी यांचे क्रीडाक्षेत्रासह सर्वत्र अभिनंदन होत आहे.
