बेळगाव लाईव्ह :बेळगाव ‘येथील दि पायोनियर अर्बन बँक लिमिटेड या 118 वर्षे पूर्ण केलेल्या सहकारी बँकेने गेल्या आर्थिक वर्षात 156 कोटी 70 लाखाच्या ठेवी जमा केल्या असून आजवरचा हा बँकेच्या इतिहासातील विक्रम आहे. गेल्या वर्षी 126 कोटी 47 लाख च्या ठेव्ही होत्या त्यामध्ये सुमारे 30 कोटीच्या ठेवींची वाढ झाली असून कर्ज वितरणातही 22 कोटीची वाढ झाली आहे.
गतसाली 94 कोटी 16 लाखाची कर्जे वितरित करण्यात आली होती यावर्षी 116 कोटी अकरा लाखाची कर्जे वितरित करण्यात आली आहेत. बँकेचा एनपीए शून्य टक्के असून बँकेने प्रथमच दोन कोटी चार लाख 91 हजार चा निव्वळ नफा मिळवला आहे .
गत साली नफा एक कोटी 55 लाख 55000 होता. या यशाबद्दल बँकेचे सर्व संचालक आणि सर्व कर्मचारी यांच्यावतीने बुधवारी सायंकाळी बँकेमध्ये केक कापून आनंदोत्सव साजरा करण्यात आला. उपस्थितांचे स्वागत करून बँकेचे सीईओ अनिता मूल्या यांनी बँकेने केलेल्या प्रगतीची माहिती दिली.
चेअरमन प्रदीप अष्टेकर यांनी केक कापला त्यानंतर ते बोलताना म्हणाले की “गेल्या ऑक्टोबर महिन्यामध्ये रिझर्व बँक ऑफ इंडियाच्या जनरल मॅनेजर श्रीमती मीनाक्षी गड या बेळगावात आल्या असताना त्यांनी बेळगाव शहरातील सर्व बँकांच्या संचालक मंडळाबरोबर चर्चा करून त्यांना ठेव्हीची उद्दिष्ट दिले होते.
त्याचवेळी यंदा आम्ही दीडशे कोटीच्या ठेवीचा टप्पा पार करू असे आश्वासन दिले होते. बँकेचे संचालक व कर्मचारी वर्गांच्या सहकार्यामुळे हा ठेवीचा टप्पा आम्ही पार केला असून याही पुढे अशीच घोडदौड करत राहू” असा विश्वास त्यांनी व्यक्त केला.
बँकेचे व्हाईस चेअरमन रणजीत चव्हाण पाटील यांनी ‘चेअरमन अष्टेकर यांनी आखलेल्या योजनातून आम्ही हे यश पार करू शकलो ‘असे मत व्यक्त केले तर संचालक शिवराज पाटील यांनी गेल्या पाच वर्षात बँकेने केलेल्या उल्लेखनीय प्रगतीचा आढावा घेऊन “ठेवी -कर्जे आणि इतर बाबतीतही जवळजवळ दुप्पट प्रगती साध्य केलीआहे”असे सांगितले.
“सक्षम टीम लीडर असलेल्या प्रदीप अष्टेकर यांनी नियोजनबद्धरीत्या काम करून ज्या ज्या वेळी जी जी धोरणे आखावी लागतात ती आखून हे यश संपादन केले आहे. त्यामुळे याही पुढे संचालक मंडळ आणि कर्मचारी वर्गाने चेअरमन ना योग्य साथ दिली तर अनेक शिखरे पादाक्रांत करता येतील” असे विचार संचालक आणि बोर्ड ऑफ मॅनेजमेंट चे चेअरमन अनंत लाड यांनी बोलताना व्यक्त केले. याप्रसंगी बँकेचे सर्व संचालक, कर्मचारी वर्ग मोठ्या संख्येने उपस्थित होता.
