बेळगाव लाईव्ह :होळी आणि रंगपंचमी सणाच्या पार्श्वभूमीवर पोलिसांनी धडक मोहिमेद्वारे गेल्या तीन दिवसात बेळगाव शहर पोलीस आयुक्तालय कार्यक्षेत्रातील विविध तीन ठिकाणी कारवाई करत तब्बल सुमारे 83 हजार 520 रुपये किमतीच्या गांजासह एकूण सुमारे 1 लाख 14 हजार 550 रुपये किमतीचा मुद्देमाल जप्त केला आहे.
मिळालेल्या माहितीनुसार, अंमली पदार्थ विक्रेत्यांविरुद्ध मोहिम उघडणाऱ्या सीसीबीच्या अधिकाऱ्यांनी गेल्या गुरुवारी सायंकाळी हुदली येथील दोघा जणांना अटक करून त्याच्याकडून 1 किलो 56 ग्रॅम गांजा जप्त केला आहे. बाजारभावानुसार या गांजाची किंमत 50,000 रुपये इतकी होते.
पोलिसांनी अटक केलेल्यांची नांवं मुजफ्फर मुसाखान बाळेकुंद्री (रा. हुदली) आणि जियाउल रेहमान मुजावर (रा. सोलापूर, ता. हुक्केरी) अशी आहेत. गांजासोबतच या दोघांकडून रोख 1,530 रुपये आणि मोटरसायकल असा एकूण 70,000 रुपये किमतीचा मुद्देमाल जप्त केला.
अन्य एका कारवाईत काल शनिवारी शहरातील गणाचारी गल्ली येथे गांजा विक्री करणाऱ्या एकाला खडेबाजार पोलिसांनी अटक करून त्याच्याकडील 3520 रुपये किमतीचा 176 ग्रॅम गांजा, 610 रुपयांची रोख रक्कम आणि मोटरसायकल असा एकूण 14,200 रुपयांचा मुद्देमाल जप्त केला. पोलिसांनी अटक केलेल्या आरोपीचे नांव आकाश सुनील परीट (रा. गणाचारी गल्ली, बेळगाव) असे आहे.
याव्यतिरिक्त मिळालेल्या खात्रीशीर माहिती आधारे उद्यमबाग पोलिसांनी मजगाव येथील तानाजी गल्लीतील सतीश सुरेंद्र बेळगावकर यांच्या घरासमोरील खुल्या जागेत गांजाची विक्री करणाऱ्या दोघा जणांना ताब्यात घेऊन त्यांच्याकडील 30,000 रुपये किमतीचा 750 ग्रॅम गांजा तसेच 350 रुपयांची रोख रक्कम जप्त केली. पोलिसांनी अटक केलेल्या आरोपींची नावे शिवनागय्या मुत्तया उमजगीमठ (रा. केएमएफ विद्यानगर हुबळी -धारवाड नगर) आणि आकाश दिलीप दोडमणी (रा. जुने मच्छे बेळगाव) अशी आहेत.
होळी आणि रंगपंचमी सणाच्या पार्श्वभूमीवर वरिष्ठ पोलीस अधिकाऱ्यांच्या मार्गदर्शनाखाली उपरोक्त कारवाया करण्यात आल्या. याबद्दल शहर पोलीस आयुक्तांसह उपायुक्तांनी संबंधित पोलीस ठाण्यांचे पोलीस निरीक्षक आणि त्यांच्या हाताखाली कारवाईत सहभागी पोलीस कर्मचाऱ्यांना शाबासकी दिली आहे.
