बेळगाव लाईव्ह : पावसाळी वातावरणासह शहराच्या कानाकोपऱ्यात साचलेले घाणेचे ढीग आणि तुंबलेल्या गटारींमुळे डासांचा प्रादुर्भाव वाढवून नागरिकांच्या आरोग्यावर धोका निर्माण झाला आहे.
यासाठी युद्धपातळीवर संपूर्ण शहर परिसरात फॉगिंग मशीनद्वारे औषध फवारणी करण्यात यावी. तसेच हा मुद्दा उद्याच्या महापालिका बैठकीत चर्चेस घेण्यात यावा, अशी मागणी शहरवासीयांतर्फे जायंट्स ग्रुप ऑफ बेळगाव मेनने महापौरांकडे केली आहे.
जायंट्स ग्रुप ऑफ बेळगाव मेनचे अध्यक्ष सुनील मुतगेकर यांच्या नेतृत्व खालील क्लबच्या पदाधिकारी व सदस्यांनी आज गुरुवारी सकाळी उपरोक्त मागणीचे निवेदन महापौर शोभा सोमनाचे यांना सादर केले. यावेळी उपमहापौर रेश्मा पाटील देखील उपस्थित होत्या.
निवेदन स्वीकारताना महापौर सोमनाचे यांनी आम्हालाही डासांचा त्रास चुकलेला नाही असे सांगून डासांचा उपद्रव वाढल्याचे मान्य केले. तसेच योग्य ती कार्यवाही करण्याचे आश्वासन दिले. यावेळी शहरातील सर्व प्रभागात फॉगिंग मशीनद्वारे औषध फवारणी सुरू असल्याचे महापौर कक्षात उपस्थित असलेल्या कांही नगरसेवकांचे म्हणणे होते.
मात्र ज्यांच्या सदस्यांनी तशी कोणतीही फवारणी सुरू नसल्याचे महापौरांना सांगितले. बेळगाव शहराच्या कानाकोपऱ्यात घाणीचे ढीग आणि तुंबलेल्या गटारीमुळे डासांची पैदास वाढले आहे. झोपडीत राहणाऱ्यांपासून प्रत्येकाला डासांनी हैराण करून टाकले आहे.
या डासांमुळे नागरिकांना विविध आजारांनी ग्रासले असताना महानगरपालिकेचा आरोग्य विभाग मात्र सुस्त असल्याचे दिसत आहे. आम्ही तुम्हास विनंती करू इच्छितो की ताबडतोब संपूर्ण शहर परिसरात फॉगिंग मशीनद्वारे औषध फवारणी करून डासांचा नायनाट करावा, अशा आशयाचा तपशील निवेदनात नमूद आहे.
निवेदन सादर करतेवेळी जायंट्स मेनचे अध्यक्ष सुनील मुतगेकर यांच्यासह सचिव लक्ष्मण शिंदे, मदन बामणे, अजित कोकणे, भरत गावडे, दिगंबर किल्लेकर आदी उपस्थित होते.
