तिसऱ्या रेल्वे गेट येथील रेल्वे उड्डाणपुलाचे काम बरेच महिने रेगाळले असले तरी आता या कामाने गती घेतली असून एप्रिल अखेरपर्यंत ते पूर्ण होण्याची शक्यता आहे. गेल्या शुक्रवारी गर्डर बसविण्याच्या कामाला प्रारंभ झाला आणि शनिवारी तब्बल 320 टनाचा गर्डर पुलावर यशस्वीरित्या बसवण्यात आला.
इन्फ्रा प्रोजेक्ट प्रा. लि. या कंपनीने तिसऱ्या रेल्वे गेट उड्डाणपुलाचे कंत्राट घेतले असून जून 2019 मध्ये कामाला सुरुवात झाली आहे. गर्डर बसविणे हे अत्यंत कठीण व आव्हानात्मक काम असल्यामुळे तो बसविण्यात येताच कंपनीला मोठा दिलासा मिळाला. तत्कालीन रेल्वे राज्यमंत्री सुरेश अंगडी यांनी हा प्रकल्प मंजूर करण्याबरोबरच त्याचे उद्घाटनही केले होते. सध्या विद्यमान खासदार मंगला अंगडी उड्डाणपुलाच्या कामाचा पाठपुरावा करत आहेत. काल रविवारी त्यांनी प्रकल्पस्थळी भेट देऊन आतापर्यंत झालेल्या कामाची पाहणी केली.
गेल्या तीन महिन्यात पुलाच्या फॅब्रिकेशनचे काम पूर्ण करण्यात आले आहे. गर्डरच्या फॅब्रिकेशनचे काम हैदराबाद येथे वाॅल्सन ब्रिजीस येथून करून घेण्यात आले आहे.
हा एकूण प्रकल्प 38 कोटी रुपयांचा असून पुलावरील 320 टनाच्या गर्डरची रुंदी 12 मीटर आणि लांबी 580 मीटर आहे. काम पूर्ण होण्यास विलंब झाला. परंतु त्यामध्ये अनेक नैसर्गिक अडचणी आल्या. त्यामुळे आमचा नाईलाज झाला.
आता कामाने गती घेतली असून गर्डर बसविणे खूप आव्हानात्मक तितकेच कौशल्यपूर्ण काम होते. कंपनीच्या कामाचा दर्जा उत्कृष्ट असून किमान 100 वर्षे हा पूल टिकून राहील, असा विश्वास इन्फ्रा प्रोजेक्ट प्रा. लि. चे व्यवस्थापक मंजुनाथ यांनी व्यक्त केला आहे.