बेळगाव शहरातील क्लब रोडवर बेळगाव महापालिकेकडून कार पार्किंगची सोय करण्यात आली आहे. मात्र पार्किंगसाठीची भाडे आकारणी अन्यायकारक असल्याने वाहनचालकांमध्ये तीव्र नाराजी व्यक्त होत असून ही भाडे आकारणी मागे घ्यावी, अशी जोरदार मागणी होत आहे.
बेळगाव महापालिकेकडून शहरातील क्लब रोडवर सिव्हिल हॉस्पिटलच्या बाजूने रस्त्याच्या एका बाजूला कार पार्किंगची सुविधा उपलब्ध करण्यात आली आहे. या ठिकाणी कार पार्किंगचा भाडे आकारणी फलक लावण्यात आला आहे. या फलकानुसार क्लब रोडवर रस्त्याशेजारी चारचाकी वाहने पार्क करण्यास तीन तासासाठी सुमारे 40 रुपये (39.90 रु.), सहा तासासाठी सुमारे 80 रुपये (79.80 रु.) आणि 12 तासासाठी सुमारे 160 रुपये (159.60 रु.) भाडे आकारणी केली जात आहे.
ही भाडे आकारणी अन्यायकारक असल्याची जोरदार तक्रार वाहनचालकांकडून केली जात आहे. कारण सदर मार्गावर सिव्हिल हॉस्पिटलसह अनेक सरकारी कार्यालय, इन्शुरन्स ऑफिस, बँका व सोसायट्या आहेत. त्यामुळे स्थानिक बेळगावकरांची कामानिमित्त या ठिकाणी दिवसातून बऱ्याचदा ये -जा सुरू असते. तेंव्हा महापालिकेच्या कार पार्किंगचे दर पत्रक पाहता एखाद्या चारचाकी वाहन चालकाला क्लब रोडवरील कार्यालय अथवा बँकेमध्ये दहा-पंधरा मिनिटाच्या कामासाठी 40 रुपये मोजावे लागणार आहेत. त्याचप्रमाणे जर संबंधित कामासाठी त्याला दिवसातून दोन-तीन वेळा क्लब रोडवर जावे लागल्यास हा भुर्दंड आणखी वाढणार आहे.
महापालिकेने सदर कार पार्किंग कंत्राटी पद्धतीने व्ही. व्ही. पाटील नामक व्यक्तीला चालविण्यास दिले आहे. अवघ्या पंधरा-वीस मिनिटांच्या कामासाठी चाळीस रुपये मोजावे लागत असल्यामुळे कांही त्रस्त वाहनचालकांनी याबाबत भाडे वसूल करणाऱ्या कर्मचाऱ्याला जाब विचारल्यास अधिकृत परवानगीने आम्ही कार पार्किंग भाडे वसुलीचे कंत्राट घेतले आहे. त्यामुळे निश्चित केलेले भाडे तुम्हाला द्यावेच लागेल असे उत्तर मिळत आहे. त्यामुळे वाहनचालकांमध्ये तीव्र नाराजी व्यक्त होत आहे.
शहराला वाहन पार्किंगची गरज आहे हे जरी खरे असले तरी भाडे आकारणी पार्किंग व्यवस्था ही योग्य जागी करावी. सरकारी कार्यालय, हॉस्पिटल बँका वगैरे असलेल्या ठिकाणच्या रस्त्यावर पार्किंगची सोय गरजेची आहे. तथापि त्यासाठी भाडे आकारणी करणे म्हणजे एक प्रकारे वाहन चालकांची लूट करण्याचा प्रकार आहे. कारण अशा ठिकाणी येणारे शहरातील नागरिक कामानिमित्त अत्यंत अल्प काळासाठी येत असतात. बऱ्याच जणांना सरकारी अथवा बँकेच्या कामासाठी या ठिकाणी वारंवार यावे लागते, जर प्रत्येक वेळी त्यांना पार्किंगचे 40 रुपये द्यावे लागले तर त्यांना मोठा भुर्दंड बसणार आहे. यासाठी अशा ठिकाणी पार्किंग भाडे आकारणी करणे अत्यंत चुकीचे आणि अन्यायकारक असल्याच्या तीव्र प्रतिक्रिया व्यक्त होत आहेत. त्याचप्रमाणे क्लब रोडच नव्हे तर सरकारी कार्यालये, बँका असणाऱ्या ठिकाणी रस्त्यावरील पार्किंगसाठी भाडे आकारणी केली जाऊ नये, अशी जोरदार मागणी केली जात आहे.
