विधानपरिषद निवडणुकीसाठी बेळगाव स्थानिक संस्थांच्या मतदार संघाच्या दोन जागांच्या तिकीटांकरिता नेते मंडळींकडून दबाव येत असल्यामुळे राज्यातील काँग्रेस नेतृत्व सध्या कोंडीत सापडल्याचे दिसून येत आहे. आज मंगळवारपासून निवडणूक प्रक्रिया सुरू होणार असली तरी अद्यापपर्यंत काँग्रेसचे वरिष्ठ नेते बेळगावसाठी अंतिम उमेदवार निवडण्यात अपयशी ठरले आहेत.
गेल्या तीन-चार दिवसांपासून अनेक वरिष्ठ नेते बेंगलोर येथे बैठका घेऊन बेळगाव मतदार संघातील अंतिम दोन उमेदवार निवडण्यासाठी प्रयत्नशील आहेत. परंतु विविध बाजूने येणाऱ्या वाढत्या दबावामुळे उमेदवारांना बाबतचा अंतिम निर्णय लांबणीवर पडत आहे. बेंगलोर येथे पक्षाच्या बैठकीमध्ये बेळगाव मतदार संघातील अंतिम उमेदवार निवडण्यासाठी आम्ही गेल्या तीन -चार दिवसांपासून प्रयत्न करत आहोत. परंतु या मतदारसंघातून काँग्रेसचा एक उमेदवार उभा करायचा की दोन्ही जागांवर उमेदवार उभे करायचे या बाबतचा निर्णय व्हावयाचा आहे. बैठकीत अनेक मातब्बर नेते आणि युवा नेत्यांची नांवे पुढे आली आहेत. परंतु आमच्यात अद्याप एकमत झालेले नाही, अशी माहिती केपीसीसी कार्याध्यक्ष सतीश जारकीहोळी यांनी दिली. सहा वेळा आमदार झालेले माजी खासदार प्रकाश हुक्केरी आणि युवानेते चन्नराज हट्टीहोळी यांच्या नावांना अनेकजणांनी पसंती दिली आहे. तथापि तशी अन्य कांही नावे देखील यादीत आहेत. याखेरीज निवडणुकीची एक जागा लढवायची की दोन्ही लढवायच्या हे देखील ठरायचे आहे असेही जारकीहोळी यांनी सांगितले.
यापूर्वीच्या निवडणुकांमध्ये बेळगाव स्थानिक संस्थांच्या मतदारसंघातून काँग्रेस आणि भाजपने प्रत्येकी एकच उमेदवार उभा केला असला तरी यावेळी या दोन्ही पक्षाकडून दोन्ही जागा लढविल्या जाणार असल्याची शक्यता सूत्रांनी वर्तविली आहे. तसे झाल्यास भाजपकडून उमेदवार घोषणा केंव्हा होईल याची काँग्रेस वाट पाहिली किंवा याच्या उलट देखील होऊ शकते. आमदार लक्ष्मी हेब्बाळकर यांचे बंधू चन्नराज हट्टीहोळी यांच्या व्यतिरिक्त इतर कोणाला उमेदवारी दिल्यास जारकीहोळींकडून लखन यांचे नांव मागे घेतली जाण्याची शक्यता आहे. मात्र हट्टीहोळी यांना काँग्रेसची उमेदवारी मिळाल्यास लखन जारकीहोळी देखील निवडणूक रिंगणात उतरणार हे निश्चित असल्याचे सूत्रांनी सांगितले.
आमदार लक्ष्मी हेब्बाळकर आणि आमदार रमेश जारकीहोळी यांच्यातील शीतयुद्ध सर्वश्रुत आहे. त्यामुळे चन्नराज हट्टीहोळी यांना उमेदवारी देणे काँग्रेसला महागात पडू शकते. कारण त्यांना जर उमेदवारी मिळाल्यास गोकाकचे जारकीहोळी बंधू कदाचित संघटितपणे त्यांच्या विरोधात कार्यरत राहतील असे सूत्रांनी स्पष्ट केले आहे. दरम्यान युवा चन्नराज हट्टीहोळी यांना तिकीट मिळावे यासाठी बेळगावातील अनेक नेतेमंडळींनी पाठिंबा दर्शविला आहे आणि मोठी लढत देण्यासाठी हट्टीहोळी देखील तयारीला लागले असल्याचे सूत्रांनी सांगितले. याखेरीज बेळगाव जिल्ह्यातील स्थानिक संस्थांमधील प्रकाश हुक्केरी यांची लोकप्रियता लक्षात घेऊन काँग्रेस नेतृत्वातील एक गट त्यांच्या बाजूने ठामपणे उभा आहे.
Article courtasy -the new indian express
