विधानपरिषद निवडणुकीचे वारे वाहू लागल्यानंतर बेळगावचे जिल्हा प्रशासनही पूर्वतयारीत गुंतले आहे. या पार्श्वभूमीवर प्रभारी जिल्हाधिकारी वेंकटेश कुमार यांनी पत्रकार आणि माध्यम प्रतिनिधींची भेट घेतली.
मिट टू प्रेस मध्ये बोलताना यावेळी निवडणुकीसंदर्भातील बरीच महत्त्वाची माहिती त्यांनी माध्यमांना दिली आहे. विधानपरिषद निवडणुकीत नगरसेवकांना मतदानाचा अधिकार मिळणार आहे ही प्रमुख माहिती जिल्हाधिकाऱ्यांकडून प्राप्त झाली असून नगरसेवकांच्या मतांचा मार्ग मोकळा झाला आहे.
इतके दिवस नगरसेवकांना मतदानाचा अधिकार मिळणार की नाही?हा प्रश्न गंभीर बनला होता मात्र हा प्रश्न आता सुटला असल्याची माहिती उपलब्ध झाली.विधानपरिषद निवडणुकीची 14 रोजी मतमोजणी असणार आहे तर 13 पासून बेळगावात विधानसभेचे हिवाळी अधिवेशन सुरू होत आहे. यामुळे यंत्रणेवर येणाऱ्या ताणाचे विकेंद्रीकरण करण्याची गरज निर्माण झाली आहे.
मतमोजणीची स्ट्रॉंग रूम आणि मत मोजणी व्यवस्था चिकोडी येथे करण्यास परवानगी देण्याची मागणी जिल्हाधिकाऱ्यांकडून निवडणूक आयोगाकडे करण्यात आली आहे. या मागणीचा विचार निवडणूक आयोग नक्कीच करेल असा विश्वास जिल्हाधिकाऱ्यांनी व्यक्त केला असून मतमोजणी चिकोडी येथे होण्याला हिरवा कंदील मिळणार आहे.
अवकाळी पाऊस आल्याने झालेल्या नुकसानीचे सर्वेक्षण सुरू असून नुकसान झालेल्या व्यक्तींना सरकारकडून नुकसान भरपाई मिळणार आहे. यासंदर्भातील अहवाल निर्मिती झाल्यावर ती लागलीच सरकारकडे पाठविली जाईल असेही जिल्हाधिकारी म्हणाले.
अवकाळी पावसाच्या धुमकुळात मुडलगी येथे दोघांचा मृत्यू झाला तर बेळगाव आणि खानापूर तालुक्यात पिकांचे प्रचंड नुकसान झाले आहे. याचा अहवाल सरकारकडे सादर करण्याची प्रक्रिया सुरू असल्याची माहिती जिल्हाधिकाऱ्यांनी दिली आहे.
