बेळगाव विधानपरिषद निवडणूक आणि सुवर्णसौध मध्ये होणाऱ्या विधिमंडळाच्या हिवाळी अधिवेशनाच्या पार्श्वभूमीवर बेळगाव पोलिस आयुक्तालयाच्या वतीने बंदोबस्ताचे नियोजन करण्यात आले आहे.
निवडणूक व अधिवेशन शांततेत पार पाडावे यासाठी सुमारे चार हजार पोलिसांचा फौजफाटा बंदोबस्तासाठी तैनात करण्यात येणार आहे. यासाठी पर जिल्ह्यातून दोन हजार पोलिसांची अतिरिक्त कुमक मागवण्यात आली आहे.
विधान परिषदेच्या जिल्ह्यातील दोन जागांसाठी दहा डिसेंबरला मतदान होणार आहे. तर 14 तारखेला मतमोजणी होणार आहे. मतमोजणी च्या आदल्या दिवशी म्हणजे 13 डिसेंबर पासून येथील सुवर्णसौध मध्ये कर्नाटक विधिमंडळाचे हिवाळी अधिवेशन सुरू होणार आहे. त्यामुळे पोलीस खात्यावर बंदोबस्ताची जबाबदारी वाढली आहे.
हिवाळी अधिवेशन दरम्यान स्फोटक वस्तू निष्क्रिय पथक, श्वानपथक, सशस्त्र पोलिसांसह विशेष पोलिस तैनात करण्यात येणार आहेत. बेळगाव पोलीस आयुक्तालय आणि पोलीस मुख्यालयाच्या अखत्यारीतील दोन हजार पोलिसांची बंदोबस्तासाठी नियुक्ती करण्यात आली आहे. तर पर जिल्ह्यातून दोन हजार पोलिसांचा अतिरिक्त फौजफाटा बोलविण्यात येणार आहे.
कोणत्याही प्रकारे कायदा हाती घेण्याचा प्रयत्न केल्यास गय केली जाणार नाही .तसेच अधिवेशन आणि निवडणूक काळात अनुचित प्रकार निदर्शनास आल्यास त्यांच्यावर कठोरातील कठोर कारवाई करण्यात येईल. अशी माहिती देण्यात आली आहे.
