भूतरामनहट्टी येथील राणी चन्नम्मा निसर्ग धाम प्राणिसंग्रहालयात नकुल, कृष्णा आणि निरुपमा या नावांच्या तीन सिंहांचे आगमन झाले असून त्यांना दररोज प्रत्येकी 10 किलो मटण लागत असल्यामुळे 18000 रुपये इतका दिवसाकाठी खर्च अपेक्षित आहे. परिणामी महिन्याकाठी तीन सिंहांना मिळून 5 लाख 40 हजार रुपये खर्च अपेक्षित आहे, अशी माहिती वन खात्याकडून देण्यात आली आहे.
गणेश आणि क्षिप्रा या सिंह -सिंहिनीचे छावे असणारे नकुल, कृष्णा आणि निरुपमा या तीन आशियाई सिहांना सध्या काॅरन्टाईन करण्यात आले असून 20 दिवसांनी नागरिकांना हे सिंह पाहण्याची संधी मिळणार आहे. सिंह हा जंगलाचा राजा म्हणून ओळखला जातो तो मांसाहारी प्राणी आहे. एका सिंहाला दिवसाकाठी 10 किलो मटन अपेक्षित असल्यामुळे दिवसाकाठी 30 किलो मटण भूतरामनहट्टी येथे दाखल झालेल्या सिहांना लागणार आहे.
त्यामुळे महिन्याकाठी 900 किलो मटण लागणार असून त्यावर 5 लाख 40 हजार रुपये खर्च अपेक्षित आहे. जगभरात आशियाई किंवा आफ्रिकन या दोन प्रकारचे सिंह आढळतात आशियाई सिंहांचे अस्तित्व हे पूर्वापार भारतातच राहिलं असून गेल्या कांही वर्षापासून तर ते गुजरातमधील गीर अभयारण्य पुरतेच उरले आहेत. आशियाई सिंह एकेकाळी ग्रीसपासून मध्य भारतात मध्यप्रदेश उत्तर भारतात बिहारपर्यंत होते. कालांतराने शिकारीमुळे ते आता फक्त गीर अभयारण्य पुरते मर्यादित आहेत.
भारताला स्वातंत्र्य मिळाल्यानंतर सिंहांना देखील अस्तित्व धोक्यात आलेल्या प्रजातीच्या यादीत टाकण्यात आले आणि त्या दृष्टीने कांही पावले उचलली गेली. गुजरातमधील गीर येथील घनदाट जंगल सिंहांसाठी संरक्षित वनक्षेत्र जाहीर करण्यात आले आहे. गीर अभयारण्यातील सिंहांना आशियाई सिंहाप्रमाणे “इंडियन लायन” असेही संबोधले जाते. आफ्रिकेतील जंगलात सिंहाची संख्या खूप जास्त आहे. 150 ते 250 किलो वजनाचा सिंह हा तसा सामाजिक प्राणी आहे.
सिंहांचे अस्तित्व 10 हजार वर्षापासून आशिया आणि आफ्रिकामध्ये आढळते पूर्वी अस्तित्वात असलेले युरोपीयन सिंह आणि बारबेरी सिंह हे आता नामशेष झाले आहेत. पांढरा सिन्हा दक्षिण आफ्रिकेत आढळतो. त्याचे सरासरी आयुष्य 10 ते 14 वर्षे असते आणि ते लहान जंगलात आढळतात.
चितळ, हरीण, काळवीट, नीलगाय, रानडुक्कर आदी प्राणी हे सिंहांचे खाद्य आहे. कर्नाटकात म्हैसूर, बंगलोर, चित्रदुर्ग, शिमोगा, हम्पी, दावणगिरी, गदग, गुलबर्गा याठिकाणी प्राणिसंग्रहालय आहेत. आता त्यात भूतरामनहट्टी येथील राणी चन्नम्मा निसर्ग धाम प्राणिसंग्रहालयाची भर पडली आहे.
