बसवण कुडची भागाचा विकास बरेच दिवस खुंटला होता. या भागाच्या विकासासाठी अनेकवेळा मागणी करण्यात येत होती. या मागणीचा विचार करून आज या गावाला भेट देऊन शहर उत्तरचे आमदार अनिल बेनके यांनी विकासकामांना प्रारंभ केला. या गावच्या विकासकामांसाठी ८.५ कोटी रुपयांचा निधी मंजूर करण्यात आला असल्याची माहिती आमदारांनी दिली.
सांबरा मुख्य रस्त्यापासून बसवण कुडची गावातील आतील भागातील छोटे रस्ते, पिण्याच्या पाण्याची सोय, डेकोरेटिव्ह पथदीप आणि इतर अनेक विकासकामांचा आज प्रारंभ करण्यात आला.
आमदार अनिल बेनके यांच्या हस्ते कुदळ मारून आणि भूमिपूजन करून या कामाची सुरुवात करण्यात आली. यावेळी प्रसारमाध्यमांशी बोलताना आमदार अनिल बेनके म्हणाले, कि बसवण कुडची गावातील नागरिकांनी अनेकवेळा येथील विकासकामांसाठी मागणी केली होती. कोरोनाकाळात या कामांना सुरुवात करण्यात आली होती.
परंतु सर्वत्र लॉकडाऊन लागू करण्यात आल्यामुळे हि विकासकामे रखडली होती. आज पुन्हा आपण या भागाची पाहणी केली असून संबंधित विकासकामांसाठी त्या-त्या विभागाच्या कंत्राटदारांनाही बोलाविण्यात आले आहे. हा भाग कोणत्याही मूलभूत सुविधेपासून वंचित राहू नये यासाठी या भागातील सर्व विकासकामे लवकरात लवकर पूर्ण करण्यात यावीत. लोकसभा निवडणुकीच्या पार्श्वभूमीवर कोणत्याही क्षणी आचारसंहिता लागू होण्याची शक्यता आहे.
तसेच पावसाळ्यापूर्वी ही विकासकामे पूर्ण करावीत, यासाठी कंत्राटदारांना सूचना देण्यात आल्या आहेत, असे त्यांनी सांगितले. याव्यतिरिक्त देवराज अरस कॉलनीतील जवळपास सर्व समस्या निवडण्यात आल्या आहेत. तक्रारीसाठी कोणतीही जागा शिल्लक राहणार नाही. तसेच बसवण कुडची भागातील कामकाज सुरु असताना गावातील पंचमंडळी आणि कंत्राटदारांनी आपापसात समन्वय साधून ही कामे योग्य रीतीने पूर्ण करून घ्यावीत, अशा सूचनाही त्यांनी दिल्या.
बसवण कुडाची गावासाठी मंजूर करण्यात आलेला निधी आणि येथील विकासासाठी सुरु करण्यात आलेल्या कामकाजामुळे ग्रामस्थांनी आमदार अनिल बेनके यांचे आभार मानले. यावेळी विविध विभागाचे कंत्राटदार, अधिकारी, गावातील पंचमंडळी, मान्यवर आणि ग्रामस्थ उपस्थित होते.
