हवामान खात्याने प्रसिद्धीस दिलेल्या पर्जन्यवृष्टीच्या माहितीनुसार बेळगाव जिल्ह्यात यंदा आज शुक्रवार दि. 31 जुलै 2020 अखेर सर्वाधिक 332.2 मि. मी. पावसाची नोंद खानापूर तालुक्यात झाली असून सर्वात कमी 68.1 मि. मी. पावसाची नोंद अथणी तालुक्यात झाली आहे.
खानापूर तालुक्याखालोखाल आज शुक्रवार 31 जुलै 2020 पर्यंत जिल्ह्यात बेळगाव शहर परिसर (241.3 मि.मी.) आणि चिक्कोडी (205.5 मि.मी.) तालुक्यांमध्ये सर्वाधिक पाऊस नोंदविला गेला आहे. बेळगाव शहर परिसरात सर्वसामान्यपणे जुलै महिन्यात 455 मि.मी. पाऊस पडतो. येथे गेल्यावर्षी 31 जुलैपर्यंत तब्बल 482.2 मि. मी. पाऊस नोंदविला गेला होता. मात्र यावर्षी हे प्रमाण घटले असून यंदा जुलैअखेर -46.97 टक्के सरासरीने 241.3 मि.मी. पाऊस पडला आहे. बेळगाव शहर परिसराची वार्षिक पर्जन्य टक्केवारी -49.96 इतकी आहे.
खानापूर तालुक्यात सर्वसामान्यपणे जुलै महिन्यात 756 मि.मी. पाऊस पडतो. येथे गेल्यावर्षी 31 जुलैपर्यंत 84.2 मि. मी. इतका कमी पाऊस नोंदविला गेला होता. यावर्षी हे प्रमाण वाढले असून यंदा जुलैअखेर -56.06 टक्के सरासरीने 332.2 मि.मी. पाऊस पडला आहे. खानापूर तालुक्याची वार्षिक पर्जन्य टक्केवारी 292.67 इतकी आहे.
जिल्ह्यातील दरवर्षी सर्वसामान्यपणे जुलैमध्ये होणाऱ्या पावसापेक्षा अथणी, बैलहोंगल, चिक्कोडी, गोकाक, कागवाड, मुडलगी, रायबाग, रामदुर्ग आणि सौंदत्ती याठिकाणी यंदा जादा पावसाची नोंद झाली आहे. याउलट बेळगाव, हुक्केरी, खानापूर, कित्तूर आणि निपाणी येथे सर्वसामान्य पावसापेक्षा कमी पावसाची नोंद झाली आहे.
दरम्यान, गेल्या वर्षी 2019 साली जुलैमध्ये निपाणी येथे 1057.3 मि.मी., रायबाग येथे 1058.3 मि.मी., रामदुर्ग येथे 1059.3 मि.मी. आणि सौंदत्ती येथे 1060.3 मि. मी. असा सर्वसामान्य प्रमाणापेक्षा कितीतरी जास्त पटीने पाऊस पडला होता. परिणामी याठिकाणी पूर परिस्थिती निर्माण झाली होती. बेळगाव जिल्ह्यात प्रमुख पर्जन्यमापन केंद्र ज्या -ज्या ठिकाणी आहेत त्या ठिकाणी अनुक्रमे दरवर्षी जुलैमध्ये सर्वसामान्यपणे पडणारा पाऊस आणि यंदा जुलै 2020 अखेर नोंदविला गेलेला पाऊस मिलिमीटरमध्ये पुढील प्रमाणे आहे.
अथणी एचबीसी : 65 -68.1 मि.मी., बैलहोंगल आयबी : 129 -41.3 बेळगाव आयबी : 455 -241.3, चिकोडी : 134 -205.5, गोकाक : 68 -97.5, हुक्केरी एसएफ : 150 -139.5, कागवाड (शेडबाळ) :68.5 -86.2, खानापूर 756 -332.2, कित्तूर :270 -110.5, मुडलगी :67 -129.6, निपाणी आयबी : 201.8 -153.2, रायबाग : 74 -170.6, रामदुर्ग : 64 -81.2 आणि सौंदत्ती :76 -199.7 मि.मी.
