शहरातील पारिजात कॉलनी येथे कांही महिन्यांपूर्वी तब्बल 9 मोकाट कुत्र्यांना एकाच वेळी विष घालून ठार मारण्याचा खळबळजनक प्रकार उघडकीस आला होता. त्याच ठिकाणी काल सोमवारी पुन्हा एका मोकाट कुत्र्याला विष घालण्यात आले असून नागरिकांनी अशा प्रकारांना आळा घालण्यास सहकार्य करावे, असे आवाहन बेळगाव पशु कल्याण संघटनेने (बावा) केले आहे.
पारिजात कॉलनी येथे एक मोकाट कुत्रे हालचाल न करता भिंतीकडेला निपचित पडून असल्याची माहिती काल सोमवारी बाबा संघटनेला दूरध्वनीवरून मिळाली. त्या माहितीनुसार बावाचे कार्यकर्ते पशुवैद्यांना घेऊन पारिजात कॉलनी येथे गेले.
त्याठिकाणी एका भिंती शेजारी निपचित पडलेल्या मोकाट कुत्र्याला पशुवैद्य मोकळ्या जागेत आणून त्याची तपासणी केली. त्यावेळी त्या कुत्र्यावर विष प्रयोग करण्यात आल्याचे निदर्शनास आले. तेंव्हा इंजेक्शन वगैरे देऊन त्या कुत्र्यावर उपचार करण्यात आले. मात्र उपचाराचा फायदा न होता दुर्दैवाने ते कुत्रे मरण पावले.
याच पारिजात कॉलनीमध्ये सुमारे 4 महिन्यांपूर्वी तब्बल 9 मोकाट कुत्र्यांना एकाच वेळी विष घालून ठार मारण्यात आल्याचा प्रकार उघडकीस आला होता. याप्रकरणी बावाने पोलीस स्थानकात तक्रारही नोंदवली होती. तसेच या प्रकरणाचा पाठपुरावा करून आरोपींना पकडण्यात पोलिसांना सहकार्य केले होते. तथापि त्यावेळी पुराव्याअभावी पोलिसांनी आरोपींना फक्त ताकीद देऊन सोडून दिले होते. त्यानंतर आता पुन्हा एकदा पारिजात कॉलनी कुत्र्यावर विषप्रयोग झाला आहे. मुक्या प्राण्यांना विष घालून ठार मारणे हा कायद्याने गुन्हा आहे. तेंव्हा यापुढे मोकाट कुत्र्यांना विष घालण्याचा प्रकार कॉलनीतील नागरिकांच्या निदर्शनास येताच त्यांनी तात्काळ पोलिसांना अथवा बावा संघटनेला माहिती द्यावी, असे आवाहन करण्यात आले आहे.
