बेळगाव शहराचा स्मार्ट सिटीत समावेश झाल्यापासून विकासाचे गाजर दाखवून अनेकांची दिशाभूल करण्यातच महानगरपालिकेने धन्यता मानली आहे. बेळगाव शहर आणि परिसरातील स्वच्छतागृहांची अवस्था दयनीय झाली असताना देखील स्मार्ट सिटीचा गाजावाजा कमी करण्यात येत नसल्याचे प्रकार उघडकीस येत आहेत. महानगरपालिकेच्या आरोग्य विभागाकडून अनेक शौचालय व स्वच्छतागृहे सुस्थितीत असल्याचे भासविण्यात येत आहे. खरी परिस्थिती पाहता त्यांची अवस्था दयनीय झाली आहे.
शहरात विविध ठिकाणी स्वच्छतागृहे आहेत. ती सुस्थितीत नसल्याने आणि नेमक्या जागी नसल्याने अनेकांना शोधण्याची वेळ येऊन ठेपली आहे. लाखो रुपये खर्चून स्वच्छतागृहे बांधण्यात आली आहेत. मात्र त्यासाठी योग्य नियोजन नसल्याने त्यांची पूर्तता दैनिया अवस्था उडाली आहे. अशा परिस्थितीत स्मार्ट सिटीचे पांघरूण घालत नागरिकांना मात्र दाहीदिशा स्वच्छतागृहांसाठी फिरावे लागत असल्याचे दिसून येत आहे.
मनपाच्या आरोग्य विभागाने लाखो रुपये स्वच्छतागृहांच्या देखभालीसाठी आणि दुरुस्तीसाठी खर्च केल्याचे दाखविण्यात आले आहे. मात्र स्वच्छतागृहांची अवस्था पाहिल्यास त्यामध्ये जाणे देखील मुश्कील बनले आहे. नोकरी व्यवसायाच्या निमित्ताने महिला घराबाहेर पडतात. गृहिणींना ही बँक, पोस्ट, मुलांना शाळेत सोडण्यासाठी, सरकारी कार्यालयातील कामांसाठी बाहेर पडावे लागते. मात्र महिलांसाठी स्वच्छतागृह कमी असल्याने अनेकांना याचा त्रास सहन करावा लागत आहे.
ग्रामीण भागातील अनेक महिला व नागरिक न्यायालय, हॉस्पिटल, बाजारासाठी बेळगाव शहरात येत असतात. यांची सोय करण्यासाठी स्वच्छतागृहे नसल्याने अनेकांना याचा त्रास सहन करावा लागत आहे. प्रत्यक्षात शहरात महिलांसाठी उभारण्यात आलेली स्वच्छतागृहे शोधावी लागत आहेत आणि ज्या ठिकाणी स्वच्छतागृह आहेत. त्या ठिकाणी गलिच्छ आणि अस्वच्छता असल्याने तेथे जाण्यास कोणी धजत नाही. त्यामुळे यापुढे तरी महानगरपालिकेने स्वच्छतागृहांचा उपयोग नागरिकांसाठी करून द्यावा, अशी मागणी होत आहे.
