वडिलांना दिलेला शब्द पाळत, वडिलांचे स्वप्न साकार करण्यासाठी मोठी मेहनत घेऊन ग्रामीण भागातील दिपालीने सीए परीक्षेत घवघवीत यश संपादन केले. आता वडिल हयात नसले तरी वडिलांचे स्वप्न पूर्ण करण्यासाठी तिने घेतलेल्या कष्टाचे आणि यशाचे कौतुक होत आहे.
मूळची हलगा आणि सध्या जयनगर येथील रहिवासी असलेली दिपाली नेताजी कलिंग हिने गेल्या मे महिन्यात घेण्यात आलेली सीए परीक्षा उत्तीर्ण होत नावलौकिक मिळवला आहे.
शालेय जीवनापासून एक हुशार विद्यार्थिनी म्हणून दिपाली कलिंग हिने आपले प्राथमिक व माध्यमिक शिक्षण वनिता विद्यालय इंग्लिश माध्यम शाळेतून पूर्ण केलेे. त्याचप्रमाणे पदवी पूर्व शिक्षण लिंगराज कॉलेजमधून पूर्ण केल्यानंतर तिने भाऊराव काकतकर महाविद्यालयातून वाणिज्य शाखेची पदवी अव्वल श्रेणीत संपादन केली.
वडिल नेताजी कलिंग यांनी दिपालीने सीए व्हावे, हे स्वप्न पाहिले होते. त्यांचा मुलगा अभियंता असून दुसरी मुलगी डॉक्टर आहे. त्यामुळे दिपालीने सीए व्हावे, यासाठी त्यांनी प्रोत्साहन दिले होते. पण, त्यांचे पाच वर्षांपूर्वी निधन झाले. त्यामुळे त्यांच्या हयातीत सीए होता आले नाही, याची रूखरूख दिपालीला लागून होती. अखेर तिने कठोर मेहनत घेऊन वडिलांचे अधुरे स्वप्न पूर्ण केले.
चार्टर्ड अकाउंटंट (सीए) ही कठीण परीक्षा उत्तीर्ण होण्यासाठी दिपाली हिला सीए विलास हलभावी आणि शिवानंद हलभावी यांचे बहुमोल मार्गदर्शन लाभले. दिपाली ही हालगा येथील प्रतिष्ठित नागरिक व सरकारी कंत्राटदार नेताजी कलिंग यांची सुकन्या आहे.तिच्या यशात आई, वडिलांसह समस्त कलिंग कुटुंबीयांचा मोलाचा वाटा आहे. सीए परीक्षेतील यशाबद्दल दिपाली कलिंग हिचे सर्वत्र अभिनंदन होत आहे.
