बेळगाव लाईव्ह :गणेशोत्सवाच्या उत्साहात असलेल्या एका कुटुंबावर दुःखाचा डोंगर कोसळविणाऱ्या चव्हाट गल्ली परिसरातील डोर गल्ली येथील स्फोटप्रकरणाला आता नवे वळण मिळाले आहे. १४ सप्टेंबर रोजी उशिरा रात्री फ्रिजच्या स्फोटामुळे झालेल्या दुर्घटनेत एकाच कुटुंबातील सहा जणांचा मृत्यू झाला होता. या घटनेनंतर सात दिवसांनी समोर आलेल्या सीसीटीव्ही फुटेजमध्ये एक अनोळखी व्यक्ती बकेट घेऊन धमोने कुटुंबाच्या घराजवळील शेडकडे जाताना दिसत असल्याने प्रकरणाच्या तपासाबाबत काही प्रश्न उपस्थित झाले आहेत.
बकेट घेऊन आलेला अनोळखी व्यक्ती सीसीटीव्हीत कैद
धमोने कुटुंबाच्या घराशेजारील परिसरातील सीसीटीव्ही कॅमेऱ्यांच्या फुटेजची पाहणी केली असता, एक अनोळखी व्यक्ती बकेट घेऊन शेडजवळ आल्याचे दिसून आले. संबंधित व्यक्ती सुमारे चार ते पाच मिनिटे त्या परिसरात थांबल्यानंतर रिकाम्या हाताने तेथून धावत निघून गेल्याचे दृश्य कॅमेऱ्यात कैद झाले आहे.
स्फोटाच्या आधीची ही हालचाल तपासाच्या दृष्टीने महत्त्वाची ठरू शकते. मात्र, सीसीटीव्हीत दिसणाऱ्या व्यक्तीचा स्फोटाशी थेट संबंध आहे का, हे अद्याप स्पष्ट झालेले नाही. या व्यक्तीची ओळख, तो बकेट घेऊन शेडजवळ का आला होता आणि तेथून रिकाम्या हाताने का निघून गेला, याबाबत पोलिस तपासातूनच स्पष्टता मिळणार आहे.
एकाच कुटुंबातील सहा जणांचा मृत्यू
१४ सप्टेंबर रोजी रात्री घडलेल्या या भीषण दुर्घटनेत एकाच कुटुंबातील सहा जणांचा मृत्यू झाला. मृतांमध्ये शारदा गजानन धमोने, भारती राजाराम धमोने, प्रिया गजानन धमोने, गंगा गजानन धमोने, गजानन राजाराम धमोने आणि रोशन गजानन धमोने यांचा समावेश आहे.
स्फोटानंतर काही जणांचा घटनास्थळीच मृत्यू झाला, तर गंभीर जखमी झालेल्या गजानन राजाराम धमोने आणि रोशन गजानन धमोने यांचा उपचारादरम्यान मृत्यू झाला. या दुर्घटनेमुळे परिसरात शोककळा पसरली असून, कुटुंबीयांवर दुःखाचा डोंगर कोसळला आहे.
स्फोटाचे नेमके कारण अद्याप अस्पष्ट
या प्रकरणी मार्केट पोलिस ठाण्यात गुन्हा दाखल करण्यात आला आहे. सीसीटीव्ही फुटेजमध्ये दिसणाऱ्या अनोळखी व्यक्तीची ओळख पटविणे, त्याच्या हालचालींची चौकशी करणे आणि स्फोटाच्या कारणाचा तपास करणे, ही पोलिसांसमोरील महत्त्वाची बाब आहे.
स्फोटापूर्वीची व्यक्तीची हालचाल आणि दुर्घटनेचा परस्पर संबंध आहे का, याबाबत सध्या कोणताही निष्कर्ष काढता येत नाही. स्फोटाचे खरे कारण आणि सीसीटीव्हीत दिसणाऱ्या व्यक्तीची भूमिका पोलिस तपासानंतरच स्पष्ट होणार आहे.
Thumbnail Text
चव्हाट गल्ली स्फोटाला नवे वळण!
बकेट घेऊन आलेला अनोळखी व्यक्ती सीसीटीव्हीत कैद
Web Slug
belgaum-chavhat-galli-blast-case-cctv-footage-unknown-person-with-bucket
