बेळगाव लाईव्ह: मोठी स्वप्ने पाहा, स्वतःवर विश्वास ठेवा आणि कठोर परिश्रम व जिद्दीच्या जोरावर आपले ध्येय साध्य करा, असा प्रेरणादायी संदेश जिल्हाधिकारी मोहम्मद रोशन यांनी नागरी सेवा परीक्षेची (UPSC) तयारी करणाऱ्या विद्यार्थ्यांना दिला.
कर्नाटक स्टेट मुजावर फेडरेशनतर्फे मंगळवारी कॅम्प येथील इस्लामिया हायस्कूल परिसरातील हाजी अब्दुल गफ्फार मुजावर मेमोरियल हॉलमध्ये नागरी सेवा जागृती व प्रशिक्षण कार्यक्रमाचे आयोजन करण्यात आले होते. यावेळी मार्गदर्शन करताना जिल्हाधिकारी रोशन बोलत होते.
रोशन म्हणाले, व्यक्तीचे भविष्य केवळ परिस्थितीवर अवलंबून नसते. आपण किती मोठे स्वप्न पाहतो आणि ते साकार करण्यासाठी किती मेहनत करतो, यावर आपल्या भविष्याची दिशा ठरते. आयुष्यात अडचणी आल्या तरी आत्मविश्वास न गमावता सातत्याने पुढे जात राहिले पाहिजे. यावेळी त्यांनी शेरो-शायरीच्या माध्यमातून विद्यार्थ्यांना प्रेरणा दिली.
पोलीस आयुक्त भूषण बोरसे यांच्या कार्यपद्धतीतील विश्लेषणात्मक दृष्टिकोनाचा उल्लेख करत रोशन यांनी शिस्त, कठोर परिश्रम आणि व्यावसायिक दृष्टिकोनाचे महत्त्व अधोरेखित केले. अखिल भारतीय सेवांमध्ये प्रवेश केल्यानंतर मोठ्या प्रमाणावर समाजसेवा करण्याची आणि लोकसेवेतून समाधान मिळवण्याची संधी मिळते, असेही त्यांनी सांगितले.
“तुमची स्वप्ने मोठी असू द्या. तुमचे भविष्य किती मोठे असेल, हे तुमची स्वप्ने आणि ती पूर्ण करण्यासाठी तुम्ही किती मेहनत करता, यावर ठरते,” असे रोशन यांनी विद्यार्थ्यांना सांगितले. बेळगावने आपल्याला दिलेले प्रेम आणि आपुलकी ही अखिल भारतीय सेवेत काम करण्यातील विशेष बाब असल्याचेही त्यांनी नमूद केले.
अपयशाने खचू नका : भूषण बोरसे
पोलीस आयुक्त भूषण बोरसे यांनी चेतन भगत यांच्या Three Mistakes of My Life या पुस्तकाचा संदर्भ देत UPSC परीक्षार्थींना महत्त्वपूर्ण मार्गदर्शन केले. विद्यार्थ्यांनी लवकर तयारी सुरू करून परीक्षेची संपूर्ण प्रक्रिया समजून घेतली पाहिजे, असे त्यांनी सांगितले.
पर्यायी विषयाची निवड काळजीपूर्वक करणे आवश्यक असून, तांत्रिक विषयांमधील परीक्षा अत्यंत आव्हानात्मक असू शकते, असे बोरसे यांनी स्पष्ट केले. स्वतः चौथ्या प्रयत्नात नागरी सेवा परीक्षा उत्तीर्ण झाल्याचा अनुभव सांगत त्यांनी विद्यार्थ्यांना अपयशामुळे खचून न जाता प्रयत्न सुरू ठेवण्याचा सल्ला दिला.
“कधीही निराश होऊ नका. जिद्द आणि सातत्य अत्यंत महत्त्वाचे आहे,” असे बोरसे म्हणाले.
UPSCची तयारी करताना एकट्याने अभ्यास करण्याऐवजी चांगले मित्र, सहकारी परीक्षार्थी, योग्य मार्गदर्शन आणि दर्जेदार प्रशिक्षणाचा आधार घ्यावा. चांगला अभ्यासगट तयारी अधिक प्रभावी करण्यास मदत करतो, असेही त्यांनी सांगितले.
केवळ नोकरी मिळवण्याच्या उद्देशाने नव्हे, तर नागरी सेवेत प्रवेश करून समाजासाठी अर्थपूर्ण योगदान देण्याच्या दृष्टिकोनातून विद्यार्थ्यांनी तयारी करावी. ‘जागतिक दर्जाचा’ दृष्टिकोन ठेवून उत्कृष्टतेसाठी प्रयत्न करण्याचे आवाहनही बोरसे यांनी केले.
आर्थिकदृष्ट्या दुर्बल विद्यार्थ्यांसाठी सुविधांची मागणी
IFS अधिकारी अबू सालीया खान कुलकर्णी यांनी रणेबन्नूरमधील एका छोट्या गावातून आणि कन्नड माध्यमाच्या शाळेतून शिक्षण घेत भारतीय परराष्ट्र सेवेत पोहोचण्याचा आपला प्रवास विद्यार्थ्यांसमोर मांडला. मोठे स्वप्न आणि सातत्यपूर्ण प्रयत्नांच्या जोरावर हे यश शक्य झाल्याचे त्यांनी सांगितले.
आर्थिकदृष्ट्या दुर्बल विद्यार्थ्यांना नागरी सेवा परीक्षेची तयारी करता यावी, यासाठी बेळगावमध्ये वसतिगृह तसेच स्वतंत्र UPSC मार्गदर्शन पोर्टल सुरू करावे, अशी मागणी त्यांनी जिल्हा प्रशासनाकडे केली.
या जागृती व प्रशिक्षण कार्यक्रमाला मुस्लिम समाजातील मोठ्या संख्येने विद्यार्थी उपस्थित होते.
प्रोबेशनरी IAS अधिकारी रोहित सिंह, कर्नाटक स्टेट मुजावर फेडरेशनचे अध्यक्ष रेहान मुजावर, राज्य उपाध्यक्ष उस्मान मुजावर, मुस्लिम एज्युकेशन सोसायटीचे अध्यक्ष अब्दुल रशीद मुजावर यांच्यासह अन्य मान्यवर उपस्थित होते.
