बेळगाव लाईव्ह : गुन्हेगारी तपास अधिक अचूक, वैज्ञानिक आणि जलद करण्याच्या उद्देशाने कर्नाटक पोलिसांनी अत्याधुनिक मोबाईल फॉरेन्सिक व्हॅन सेवेत दाखल केली असून आता तिची सुविधा बेळगाव शहरालाही उपलब्ध झाली आहे. या अत्याधुनिक वाहनामुळे गंभीर गुन्ह्यांच्या घटनास्थळीच प्राथमिक वैज्ञानिक तपासणी करता येणार असल्याने पुरावे जतन करण्यास आणि गुन्ह्यांचा उलगडा करण्यास मोठी मदत होणार आहे.
ही मोबाईल फॉरेन्सिक व्हॅन म्हणजे एक संचारी न्यायवैद्यकीय प्रयोगशाळाच आहे. वाहनामध्ये आधुनिक फॉरेन्सिक उपकरणे, डिजिटल पुरावे तपासण्यासाठी आवश्यक यंत्रणा, फिंगरप्रिंट संकलन साहित्य, डीएनए नमुने सुरक्षित ठेवण्यासाठी विशेष सुविधा तसेच विविध प्रकारचे वैज्ञानिक तपास साहित्य उपलब्ध आहे.
यापूर्वी घटनास्थळावरील पुरावे तपासणीसाठी प्रयोगशाळेत पाठवावे लागत असल्याने वेळ लागत असे. मात्र आता खून, दरोडा, लैंगिक अत्याचार, स्फोट, संशयास्पद मृत्यू तसेच इतर गंभीर गुन्ह्यांच्या ठिकाणी ही व्हॅन थेट पोहोचून तातडीने वैज्ञानिक तपासणी करणार आहे. त्यामुळे महत्त्वाचे पुरावे नष्ट होण्याचा धोका कमी होणार असून तपास अधिक प्रभावी होईल.
या व्हॅनमुळे पोलिसांना घटनास्थळीच पुराव्यांचे संकलन, छायाचित्रण, नमुने जतन करणे, फिंगरप्रिंट उचलणे आणि प्राथमिक फॉरेन्सिक विश्लेषण करणे शक्य होणार आहे. त्यामुळे तपासाचा वेग वाढण्यासोबतच न्यायालयात सादर होणाऱ्या पुराव्यांची विश्वासार्हताही अधिक बळकट होणार आहे.
बेळगावसह उत्तर कर्नाटकातील विविध जिल्ह्यांमध्ये गंभीर गुन्ह्यांच्या तपासासाठी या आधुनिक मोबाईल फॉरेन्सिक व्हॅनचा मोठा फायदा होणार असून, वैज्ञानिक तपास पद्धतीला आणखी चालना मिळणार असल्याची माहिती पोलिस विभागाने दिली आहे.
