बेळगाव लाईव्ह: बेळगावातील बाजारपेठ पोलीस ठाण्याच्या पथकाने जुनी इंदिरा कॅन्टीनजवळ सुरू असलेल्या मटका अड्ड्यावर छापा टाकून दोघांना ताब्यात घेतले. या कारवाईत १ हजार ६१० रुपये रोख आणि मटक्याच्या चिठ्ठ्या जप्त करण्यात आल्या. एक आरोपी फरार झाला असून पोलीस त्याचा शोध घेत आहेत.
बाजारपेठेतील जुनी इंदिरा कॅन्टीनजवळ सार्वजनिक ठिकाणी मटका खेळ सुरू असल्याची माहिती मिळाल्यानंतर १७ नोव्हेंबर रोजी वरिष्ठ अधिकाऱ्यांच्या मार्गदर्शनाखाली बाजारपेठ पोलीस ठाण्याचे उपनिरीक्षक पी. जी. गंडव्वगोळ यांनी पथकासह छापा टाकला.
यावेळी सादिक हशम हाजी, विनायक श्रीकांत कित्तूरकर आणि गजानन शशिकांत हे बेकायदा मटका खेळवत असल्याचे आढळले. पोलिसांनी दोघांना ताब्यात घेतले, तर तिसरा आरोपी घटनास्थळावरून फरार झाला.
या प्रकरणी तिन्ही आरोपींविरोधात बाजारपेठ पोलीस ठाण्यात गुन्हा क्रमांक २४१/२०२६ अन्वये कर्नाटक पोलीस कायद्याच्या कलम ७८(३) अंतर्गत गुन्हा दाखल करण्यात आला आहे. फरार आरोपीचा शोध आणि पुढील तपास सुरू आहे.
या कारवाईबद्दल पोलीस आयुक्त आणि पोलीस उपायुक्तांनी संबंधित पोलीस उपनिरीक्षक व कर्मचाऱ्यांचे कौतुक केले.
बेळगावात गांजाचे सेवन करणाऱ्या आठ जणांवर गुन्हे दाखल
बेळगाव लाईव्ह: बेळगावात अमली पदार्थांचे सेवन करून सार्वजनिक ठिकाणी अस्वस्थपणे वावरणाऱ्या आठ जणांविरोधात मार्केट पोलिसांनी स्वतंत्र गुन्हे दाखल केले आहेत. १८ नोव्हेंबर रोजी राबविलेल्या विशेष मोहिमेत वैद्यकीय तपासणीत अमली पदार्थांचे सेवन केल्याचे निष्पन्न झाल्यानंतर ही कारवाई करण्यात आली.
वरिष्ठ अधिकाऱ्यांच्या मार्गदर्शनाखाली मार्केट पोलीस ठाण्याच्या पथकाने शहरातील विविध ठिकाणी ही मोहीम राबविली. त्यामध्ये आरटीओ कार्यालयाजवळ गणेश परशुराम मजूकर, खडेबाजार रस्त्यावर मोहम्मद कैफ आशिफ बागवान, खडेबाजार पोलीस चौकीजवळ फिरोज मोहम्मद आशियान बिडीकर आणि शनिवार कूटजवळ प्रतीक सुनील अळगोडीकर यांच्यावर कारवाई करण्यात आली.
तसेच खडेबाजार रस्त्यावर तौकीर अष्टल नलबंद आणि आकाश ईराप्पा निप्पाणिकर, मध्यवर्ती बसस्थानकाजवळ संकेत नारायण मुंगारी, तर अयोध्यानगर येथे सतीश भीमाप्पा बेटसूर यांच्याविरोधात कारवाई करण्यात आली.
या आठही जणांची वैद्यकीय तपासणी केली असता त्यांनी अमली पदार्थांचे सेवन केल्याचे निष्पन्न झाले. त्यानुसार मार्केट पोलीस ठाण्यात स्वतंत्र आठ गुन्हे क्रमांक २४२ ते २४९/२०२६ अन्वये एनडीपीएस कायद्याच्या कलम २७ ब अंतर्गत गुन्हे दाखल करण्यात आले असून पुढील तपास सुरू आहे.
या कारवाईत सहभागी असलेल्या पोलीस उपनिरीक्षक, सहायक पोलीस उपनिरीक्षक आणि कर्मचाऱ्यांचे पोलीस आयुक्त तसेच पोलीस उपायुक्तांनी कौतुक केले.




