बेळगाव लाईव्ह : विशेष सघन मतदार यादी पुनरावलोकन (SIR) मोहिमेत बेळगाव जिल्ह्याने राज्यात उल्लेखनीय कामगिरी करत 80.1 टक्के फॉर्म संकलन पूर्ण केले असून, हे राज्याच्या सरासरीपेक्षा सुमारे 10 टक्के अधिक असल्याची माहिती जिल्हाधिकारी मोहम्मद रोशन यांनी पत्रकार परिषदेत दिली.
जिल्ह्यातील 41 लाख 7 हजार मतदारांपैकी गेल्या 25 दिवसांत 33 लाख 10 हजार फॉर्म प्रशासनाकडे परत आले आहेत. हे सर्व फॉर्म डिजिटल करण्यात आले असून बीएलओमार्फत त्यांची ऑनलाइन पडताळणीही सुरू आहे.
जिल्हाधिकाऱ्यांनी सांगितले की, 2,42,566 मतदार “अनकलेक्टेबल” श्रेणीत आहेत. त्यापैकी 98,089 मृत, 1,06,539 कायमस्वरूपी स्थलांतरित, 4,021 पत्ता न लागलेले, तर 595 इतर कारणांमुळे वर्गीकृत करण्यात आले आहेत. तसेच 33,322 जण आधीच इतरत्र मतदार म्हणून नोंदणीकृत असल्याचे निदर्शनास आले आहे.
राजकीय पक्षांनी एका कुटुंबातील सदस्यांची नावे वेगवेगळ्या मतदान केंद्रांवर असल्याबाबत चिंता व्यक्त केली होती. यावर प्रशासनाने Absentee, Shifted, Death, Duplicate आणि अनकलेक्टेबल मतदारांची यादी सर्व राजकीय पक्षांना दिली असून, त्यांच्या बूथ लेव्हल एजंटमार्फत प्रत्यक्ष पडताळणी करण्याचे आवाहन केले आहे.
मतदारांचे नाव यादीत नसल्यास 17 ऑगस्ट 2026 रोजी प्रसिद्ध होणाऱ्या प्रारूप (Draft) मतदार यादीनंतर फॉर्म-6 भरून नव्याने नोंदणी करता येणार असल्याचेही रोशन यांनी स्पष्ट केले.
प्रशासनाकडून प्रत्येक मतदाराच्या घरी तीन वेळा भेट देण्याची प्रक्रिया राबवली जात असून, घर बंद असल्यास स्टिकर लावून पुन्हा भेट दिली जाते. त्यानंतरच संबंधित मतदाराला अनकलेक्टेबल किंवा इतर श्रेणीत समाविष्ट केले जाते, असे त्यांनी सांगितले.
पावसात आणि उन्हात काम करणाऱ्या बीएलओंच्या कार्याचे कौतुक करत, उत्कृष्ट कामगिरी करणाऱ्यांचा गौरव केला जाईल तसेच निष्काळजीपणा करणाऱ्यांवर वरिष्ठ अधिकारी लक्ष ठेवतील, असेही जिल्हाधिकाऱ्यांनी सांगितले.
महत्त्वाचे आकडे
एकूण मतदार : 41,07,000
प्राप्त फॉर्म : 33,10,000
एकूण प्रगती : 80.1%
अनकलेक्टेबल मतदार : 2,42,566
मृत : 98,089
कायमस्वरूपी स्थलांतरित : 1,06,539
पत्ता न लागलेले : 4,021
आधीच इतरत्र नोंदणीकृत : 33,322
