बेळगाव लाईव्ह :बेळगाव सिव्हिल हॉस्पिटलमध्ये उपचाराचा फायदा न होता तोंडाच्या गंभीर कर्करोगाने निधन पावलेल्या एका अज्ञात बेवारस निराधार व्यक्तीवर स्वखर्चाने अंत्यसंस्कार करून सामाजिक कार्यकर्ते माजी महापौर विजय मोरे आणि सीपीआय कालीमिर्ची यांनी आज माणुसकीचे दर्शन घडवले.
कर्करोगाने मृत्युमुखी पडलेल्या संबंधित व्यक्तीच्या पश्चात कोणीच नसल्यामुळे त्याचा मृतदेह अनेक दिवस बेळगाव सिव्हिल हॉस्पिटलच्या शवागारात ठेवण्यात आला होता. आशा होती की मृताच्या कुटुंबातील सदस्य, नातेवाईक किंवा त्याच्या ओळखीची कोणीतरी व्यक्ती त्याचा मृतदेह ताब्यात घेण्यासाठी पुढे येईल. मात्र बरेच दिवस झाले तरी कोणीही आले नाही. याबाबतची माहिती मिळताच सीपीआय कालीमिर्ची आणि माजी महापौर विजय मोरे यांनी कोणताही संकोच न बाळगता पुढाकार घेतला आणि त्या मृत बेवारस व्यक्तीच्या अंत्यसंस्काराची संपूर्ण जबाबदारी स्वीकारली. त्या अनुषंगाने त्यांनी तात्काळ सदाशिवनगर स्मशानभूमीत त्या व्यक्तीवर अत्यंत आदर व माणुसकीने अंतिम संस्कार केले. यासाठी त्यांना मार्केट पोलीस ठाण्याच्या सहाय्यक पोलीस उपनिरीक्षक सुजाता एम, पोलीस कॉन्स्टेबल निलेश अरमागावडे, निशार शमशेर, लेखनिक खानापुरे आणि सदाशिव नगर स्मशानभूमीच्या समर्पित कर्मचाऱ्यांनी सहकार्य केले. या सर्वांनी करुणा आणि सन्मानाने अंतिम संस्कार पार पाडण्यात महत्त्वाची भूमिका बजावली. यावेळी बोलताना माजी महापौर विजय मोरे यांनी पोलीस कर्मचारी आणि स्मशानभूमीच्या कर्मचाऱ्यांचे त्यांच्या प्रामाणिक सहकार्याबद्दल आणि इतक्या दयाळूपणाने व निष्ठेने केलेल्या सेवेबद्दल मनःपूर्वक आभार मानले.
