बेळगाव लाईव्ह : बेळगावच्या तहसील कार्यालयासमोर आज एक वेगळेच चित्र पाहायला मिळाले. आपल्याच शरीराच्या मर्यादांशी झुंजणाऱ्या काही शिक्षकांनी जमिनीवर बसून आंदोलन पुकारले. त्यांचे डोळे ओलावले होते, त्यांच्या हातात काठ्या होत्या, पण त्यांच्या चेहऱ्यावरील निर्धार स्पष्ट दिसत होता.
जात आणि सामाजिक सर्वेक्षणाच्या कामातून आपल्याला वगळण्याची मागणी करत बेळगावातील दिव्यांग शिक्षकांनी आज तहसील कार्यालयावर धरणे दिले. सर्वेक्षणासाठी नेमल्यामुळे त्यांना अनेक शारीरिक आणि मानसिक त्रासांना सामोरे जावे लागत आहे. त्यामुळे, सरकारने तात्काळ लक्ष घालून त्यांना यातून सूट द्यावी, अशी त्यांची मागणी आहे.
आपल्या वेदनांना वाचा फोडताना एका शिक्षकाने सांगितले, “आम्हाला चालता येत नाही, आमचे हातही व्यवस्थित काम करत नाहीत. अशा परिस्थितीत लांबच्या ठिकाणी जाऊन सर्वेक्षण करणे म्हणजे आमच्या आरोग्याशी खेळण्यासारखे आहे.” त्यांनी पुढे म्हटले,
“आमचा या सर्वेक्षणाला विरोध नाही, पण सरकारने आमच्या शारीरिक मर्यादांचा विचार करायला हवा. सणासुदीच्या काळातही आम्ही काम करत आहोत, पण लांबच्या भागात काम दिल्यास आम्ही हे काम करणार नाही. सरकारने कोणतीही कारवाई केली तरी आम्ही मागे हटणार नाही.”
यावेळी बोलताना के. एस. राचन्नवर म्हणाले, “एप्रिल-मे महिन्याच्या सुट्ट्यांमध्येही आम्ही काम केले आहे. सरकारला अडथळा आणण्याचा आमचा कोणताही हेतू नाही. पण, आम्हाला आरोग्याच्या समस्या निर्माण होत आहेत. दिव्यांग शिक्षकांना या कामातून त्वरित सूट द्यावी. जिल्हाधिकारी, तहसीलदार आणि महापालिका आयुक्तांकडे वारंवार विनंती करूनही दुर्लक्ष केले जात आहे.” ते पुढे म्हणाले, “जोपर्यंत आम्हाला सूट मिळत नाही, तोपर्यंत आमचे आंदोलन सुरूच राहील. सरकारने सामूहिक कारवाई केली तरी आम्हाला त्याची चिंता नाही. हा आमच्या सन्मानाचा प्रश्न आहे.”
या आंदोलनात मोठ्या संख्येने दिव्यांग शिक्षक उपस्थित होते.