बेळगाव जिल्ह्यात विविध ठिकाणी अपघात; अनेक जखमी
बेळगाव लाईव्ह : बेळगाव जिल्ह्यात विविध ठिकाणी वाहन अपघात झाले असून, त्यात अनेक जण जखमी झाले आहेत. पोलिसांनी दिलेल्या माहितीनुसार, हे अपघात निष्काळजीपणे वाहन चालवल्यामुळे झाले असल्याचे स्पष्ट झाले आहे.
बेळगाव ग्रामीण पोलीस स्टेशनमध्ये दाखल असलेल्या गुन्ह्यानुसार, ज्योती महेश मेणसे यांनी तक्रार दाखल केली असून लक्ष्मण यल्लाप्पा हुंदरे हे शिन्नोळीहून आपल्या मुलांसमवेत पायी येत असताना, महादेव शिवाजी खांडेकर यांच्या मोटारसायकलने त्यांना धडक दिली. या अपघातात लक्ष्मण हुंदरे आणि त्यांच्या मुलालाही दुखापत झाली आहे. खानापूर पोलिसांनी दिलेल्या माहितीनुसार, वैभव सुनील कागिनकर यांनी दीपक प्रकाश गुरव नामक व्यक्तीवर तक्रार दाखल केली असून टिळकवाडीतील रेल्वे गेटजवळ दुचाकीवरील नियंत्रण सुटून मालवाहू गाडीला धडक दिल्याने दीपक गुरव हा जखमी झाला आहे. वाहतूक उत्तर पोलीस स्टेशनमध्ये शकुंतला अशोक इळगेर यांनी तक्रार दाखल केली असून परशुराम इरप्पा कालेरी नामक व्यक्तीने अशोक राजप्पा इळगेर रस्ता ओलांडत असताना मोटरसायकलने त्यांना धडक दिली. यात इळगेर यांच्या डोक्याला, नाकाला, हात आणि पायाला गंभीर दुखापत झाली. पोलिसांनी या सर्व घटनांची नोंद करून पुढील तपास सुरू केला आहे.
