बेळगाव लाईव्ह : चिक्कोडी तालुक्यातील जैनापूर गावाच्या हद्दीत संकेश्वर-जेवर्गी राज्य महामार्गाजवळ एका प्रसिद्ध व्यावसायिकाचा मृतदेह कारमध्ये जळलेल्या अवस्थेत आढळून आला.
चिक्कोडी येथील सुप्रसिद्ध ग्रॅनाईट व्यापारी फैरोज बडगावी (४०, रा. मुल्ला प्लॉट) हे बुधवारी त्यांच्या कारमध्ये पूर्णपणे जळालेल्या अवस्थेत सापडले. आगीत कार पूर्णपणे जळून खाक झाली असून चालकाच्या सीटवर असलेला फैरोज पूर्णपणे जळाला असून सदर घटना मंगळवारी रात्री उशिरा घडली असावी, असा संशय व्यक्त करण्यात येत आहे.
या कारला राज्य महामार्गावर आग लागल्याचा संशय व्यक्त केला जात असून, बुधवारी दुपारी फॉरेन्सिक सायन्स लॅबोरेटरीच्या कर्मचाऱ्यांनी भेट देऊन कारची तपासणी केली.
चिक्कोडी पोलिसांनी घटनास्थळी पोहोचून पाहणी केली असता ही आग लागल्याचे आढळून आले, मात्र त्याच्या कुटुंबीयांनी दिलेल्या माहितीच्या आधारे पुढील तपास सुरू असल्याचे पोलिसांनी सांगितले.
दरम्यान माजी खासदार प्रकाश हुक्केरी यांनी देखील घटनास्थळी जाऊन जळालेल्या कारची पाहणी केली. झालेल्या या घटनेमुळे एकच खळबळ मारली असून पोलीस तपासनंतरच एकंदर घटना आणि त्याबाबतची माहिती समोर येणार आहे.
