बेळगाव लाईव्ह :तिसऱ्या रेल्वे गेट येथील डी मार्ट समोरील उड्डाण पुला शेजारी असलेल्या सर्व्हिस रोडवर वारंवार वाहतूक कोंडीची समस्या निर्माण होत असून रहदारी पोलिसांनी याकडे लक्ष देण्याची मागणी केली जात आहे.
तिसऱ्या रेल्वे गेट येथे अनगोळ नाका अथवा काँग्रेस रोड येथून बेळगाव -खानापूर दुपदरी मार्गाच्या पलीकडे जाण्यासाठी उड्डाणपुलाखालून जाणारा सर्व्हिस रोड वाहन चालकांसाठी वेळ वाचवणारा सोयीचा ठरतो.
तथापि डी मार्टसह उद्यमबागच्या दिशेने एकेरी वाहतुक असलेल्या या रोडवर ट्रक अथवा बस सारखे मोठे वाहन जाऊ लागल्यास अथवा विरुद्ध दिशेने एखादे चार चाकी वाहन
आल्यास वाहतुकीची कोंडी होऊन वाहन चालकांना मनस्ताप सहन करावा लागतो. तेंव्हा रहदारी पोलिसांनी याकडे लक्ष देऊन या मार्गावर वाहतूक कोंडी होणार नाही याची दक्षता घ्यावी, अशी मागणी केली जात आहे.
