बेळगाव लाईव्ह : बेळगाव जिल्हा प्रशासन आणि जिल्हा पंचायत स्वीप समिती यांच्या संयुक्त विद्यमाने आज बेळगावमध्ये तृतीयपंथीयांच्या माध्यमातून मतदान जनजागृती रॅलीचे आयोजन करण्यात आले होते.
स्वीप समितीचे अध्यक्ष राहुल शिंदे यांनी रॅलीला चालना दिल्यानंतर राणी कित्तूर चन्नम्मापासून कृष्णदेवराय सर्कल पर्यंत रॅली काढण्यात आली. आगामी लोकसभा निवडणुकीत मागील निवडणुकीपेक्षा अधिकाधिक मतदान झाले पाहिजे, प्रत्येकाने आवर्जून मतदान करावे, आपले मत आपला हक्क अशा घोषणा देत जनजागृती रॅली पार पडली.
यावेळी जिल्हा स्वीप समिती अध्यक्ष राहुल शिंदे बोलताना म्हणाले, लोकसभा निवडणुकीसाठी प्रत्येकाने मतदान प्रक्रियेत अवश्य सहभाग घ्यावा.
मतदान हा प्रत्येक नागरिकाचा लोकशाहीने दिलेला हक्क असून आपला हक्क मतदानाच्या माध्यमातून प्रत्येकाने बजावावा. आज बेळगावमध्ये तृतीयपंथीयांच्या माध्यमातून जनजागृती रॅलीचे आयोजन करण्यात आले असून ७ मे रोजी होणाऱ्या मतदानासाठी ग्रामीण भागासह संपूर्ण परिसरात जनजागृती करावी, असे आवाहन त्यांनी केले.
राज्यातील तृतीयपंथीयांना अद्याप मतदान ओळखपत्र मिळाले नाही. बेळगाव जिल्ह्यात तृतीयपंथीयांची संख्या जास्त असून यापैकी बहुतेकांना मतदानाचा अधिकार अद्याप बजावता आला नाही. अशा परिस्थितीत तृतीयपंथीयांची ओळख करून देत मतदानाविषयी जनजागृती करण्यात येत आहे, याचा आपल्याला अभिमान असल्याचे मत तृतीयपंथीयांनी व्यक्त केले.
यावेळी पालिका आयुक्त पी.एन.लोकेश, प्रकल्प अधिकारी विजयकुमार आदींसह मोठ्या संख्येने तृतीयपंथीय उपस्थित होते.
