बेळगाव लाईव्ह:महात्मा गांधी राष्ट्रीय ग्रामीण रोजगार हमी योजनेअंतर्गत काळेनट्टी गावातील गरीब दलित महिलांना रोजगार मिळावा या मागणीसाठी मजदूर नवनिर्माण संघाच्या नेतृत्वाखाली आज सोमवारी मार्कंडेयनगर ग्रामपंचायतीला घेराव घालून निवेदन सादर करण्यात आले.
याबाबतची माहिती अशी की, मार्कंडेयनगर ग्रामपंचायतीच्या हद्दीत येणाऱ्या काळेनट्टी गावामध्ये जास्ती संख्येने दलीत समाजाची गरीब कुटुंबे रहातात. महात्मा गांधी राष्ट्रीय ग्रामीण रोजगार हमी योजनेचा कायदा 2005 मध्ये अस्तित्वात आल्यापासून गावातील या गोरगरीब कष्टकरी महिलांना आज 2024 चा मार्च महिना अर्धा झालातरी मार्कंडेयनगर ग्रामपंचायतीमार्फत मनरेगा अंतर्गत काम मिळालेले नाही.
काळेनट्टी गावातील या दलीत गरीब महिलांनी यापूर्वी दोन/तीन वेळा कागदपत्रे देऊन पंचायतीतकडे रोजगाराच्या कामाची मागणी केलेली होती. तथापि सदर पंचायतीचे अधिकारी सातत्याने त्याकडे दुर्लक्ष करत असल्याचे कळताच मजदूर नवनिर्माण संघाचे राहुल पाटील यांनी काळेनट्टीला भेट दिली तसेच काळेनट्टी गावातील गोरगरीब महिलांची बैठक घऊन त्यांच्या समस्या ऐकून घेतल्या आणि त्यांना काम मिळवून देण्याचे आश्वासन दिले.
त्यानुसार अधिकाऱ्यांनी कामात कूचराई दाखवत गरीब महिलांना रोजगारापासून का वंचित ठेवले? असा जवाब विचारण्यासाठी आज सोमवारी काळेनट्टी गावातील महिलांना घेऊन मजदूर नवनिर्माण संघाने मार्कंडेयनगर ग्रामपंचायतीला घेराव घातला.
यावेळी महिला कामगारांनी जोरदार घोषणाबाजी करत तातडीने रोजगाराचे काम उपलब्ध करून देण्याची मागणी केली. त्याचप्रमाणे तशा आशयाचे निवेदन ही सादर केले. पीडीओंच्या गैरहजेरीत सेक्रेटरी गुरव व क्लार्कनी निवेदनाचा स्वीकार करून लवकरात लवकर रोजगार उपलब्ध करून देण्याचे आश्वासन दिले.
