बेळगाव : महाराष्ट्राच्या हिवाळी अधिवेशनात आज महाराष्ट्राचे मुख्यमंत्री एकनाथ शिंदे यांनी सीमाप्रश्नी मांडलेल्या ठरावाचे सीमाभागात स्वागत करण्यात आले असून महाराष्ट्र सरकारच्या या भूमिकेबद्दल अभिनंदनही केले आहे.
महाराष्ट्र सरकारने सर्वानुमते संमत केलेल्या ठरवाबद्दल महाराष्ट्र एकीकरण समितीचे नेते प्रकाश मरगाळे यांनी महाराष्ट्र सरकारच्या सत्ताधारी आणि विरोधकांचे अभिनंदन करत सर्वोच्च न्यायालयात महाराष्ट्राची भूमिका ठामपणे मांडावी, यासाठी विरोधक आणि सत्ताधाऱ्यांनी लवकरात लवकर प्रयत्न करून सीमाभागातील मराठी भाषिकांना कर्नाटकी पाशातून सोडवावे अशी विनंती केली.
याचप्रमाणे साहित्यिक गुणवंत पाटील यांनीही महाराष्ट्र सरकारने संमत केलेल्या ठरावाचे स्वागत केले. याव्यतिरिक्त महाराष्ट्र सरकारने सीमावासीयांसाठी जाहीर केलेल्या योजनांचेही स्वागत केले. भाषा टिकली तरच संस्कृती टिकते ही बाब लक्षात घेऊन महाराष्ट्र सरकारने सीमाभागातील संस्थांसाठी, संमेलनांसाठी जाहीर केलेल्या अनुदानाबद्दल त्यांनी महाराष्ट्र सरकारचे आभार मानत यापुढील काळात सीमाभागातील मराठी भाषिकांना अडीअडचणीच्या काळात महाराष्ट्र शासनाच्या मदतीचा नक्कीच फायदा होईल, असे मत व्यक्त केले. सीमाभागातील मराठी भाषिकांना मिळणारी दुटप्पी वागणूक, मराठी पत्रकार, मराठी संस्था, मराठी तरुण या सर्व बाबतीत कर्नाटकाचा होणारा अत्याचार याबाबत महाराष्ट्र शासनाकडून सीमावासीयांना आजच्या ठरावातून दिलासा मिळाला असल्याचे मत त्यांनी व्यक्त केले.
पत्रकार प्रसाद प्रभू यांनीही या ठरावाचे स्वागत करत महाराष्ट्रातील सरकारने मंजूर केलेल्या ठरावाबद्दल अभिनंदन केले. ज्याप्रकारे कर्नाटकातील सत्ताधारी आणि विरोधक एकत्रित येऊन सीमावादावर भाष्य करतात त्याचप्रकारे आज महाराष्ट्रातील सत्ताधारी आणि विरोधकांमध्ये एकमत झाले हि सीमावासीयांसाठी दिलासा देणारी बाब असल्याचे त्यांनी सांगितले.
सीमाभागातील प्रत्येक मराठी भाषिकांमधून महाराष्ट्र सरकारच्या ठरावाचे स्वागत होत असून सीमाबांधवांच्या हितदृष्टीने घेण्यात आलेल्या विविध निर्णयांचेही सीमावासीयातून आभार व्यक्त करण्यात आले.
