जलवाहिन्यांना गळती लागण्याचा प्रकार शहरवासीयांना नवीन नाही. तथापि जिल्ह्याचे केंद्र असलेल्या चक्क जिल्हाधिकारी कार्यालय आवारातील जलवाहिनीला गळती लागून मोठ्या प्रमाणात पाण्याचा अपव्यय होत असल्याने हा एक चर्चेचा विषय झाला आहे.
बेळगाव जिल्हाधिकारी कार्यालयासमोरील (डीसी ऑफिस) आवारात असलेल्या एका जलवाहिनीला काल मंगळवारपासून गळती लागली आहे. सदर जलवाहिनी फुटून मोठ्या प्रमाणात पाण्याचा फवारा बाहेर पडत आहे.
परिणामी कालपासून हजारो लिटर पिण्याचे पाणी वाया जाण्याचा प्रकार सुरू आहे. त्याचप्रमाणे कालपासून सदर ठिकाणी मोठ्या प्रमाणात पिण्याच्या पाण्याचा अपव्यय होत असताना कोणी सरकारी अधिकारी अथवा शहराचा पाणीपुरवठा आणि देखभालीची जबाबदारी असणाऱ्या एल अँड टी कंपनीचे त्याकडे दुर्लक्ष होत असल्याबद्दल सर्वसामान्यांमध्ये सखेद आश्चर्य व्यक्त होत आहे.
शहरात जलवाहिनीला गळती लागल्यास पाणीपुरवठा मंडळ अर्थात एल अँड टी कंपनी किती कर्तव्यदक्षपणे काम करते हे सर्वश्रुत आहे. शेकडो लिटर पाणी वाया गेल्यानंतर जलवाहिनीची दुरुस्ती केली जाते. हा प्रकार सर्वसामान्य जनतेच्या बाबतीत घडतो असा आजपर्यंतचा जो समज होता तो पाणीपुरवठा मंडळाने खोटा ठरवला आहे. एल अँड टी कंपनीने जिल्हाधिकारी कार्यालय आवारातील जलवाहिनी गळतीकडे दुर्लक्ष करून जिल्ह्याचे मुख्य केंद्र असलेले जिल्हाधिकारी कार्यालय देखील आपल्यासाठी फार मोठे नाही तेही सर्वसामान्याच आहे, हेच जणू दाखवून दिले आहे.
दरम्यान मोठ्या प्रमाणात जलवाहिनीतून पाणी गळती सुरू असल्यामुळे जिल्हाधिकारी कार्यालयाच्या ठिकाणी सरकारी कामासाठी येणाऱ्या तसेच विविध मागण्यांच्या पूर्ततेसाठी आंदोलन छेडून आवाज उठवण्यास येणाऱ्या लोकांची मोठी गैरसोय होत आहे. या सर्वांना मोठ्या प्रमाणात रस्त्यावरून वाहणाऱ्या पाण्यातून वाट काढताना कसरत करावी लागत आहे. तेंव्हा एकंदर परिस्थिती पाहता स्वतः खुद्द जिल्हाधिकाऱ्यांनीच पाणीपुरवठा मंडळाच्या या पद्धतीच्या गलथान, अकार्यक्षम कारभाराकडे गांभीर्याने लक्ष देण्याची गरज निर्माण झाली असून त्यांनीच संबंधित वरिष्ठ अधिकाऱ्यांची चांगली कान उघडणे करावी, अशी मागणी केली जात आहे.
हा धबधबा नव्हे तर डी सी ऑफिस समोरील पाणी गळतीचा कारंजा आहे.. सुस्त पाणी पुरवठा महामंडळाला जाग येईल का? pic.twitter.com/BNFzGNcaXE
— Belgaumlive (@belgaumlive) October 12, 2022
