घरपट्टी आणि पाणीपट्टी माफ करावी या मागणीसह विविध मागण्यांचे निवेदन कुरिहाळ (ता. जि. बेळगाव) येथील आर्मी एक्स अँड आर्मी सर्व्हीसमन वेल्फेअर असोसिएशनतर्फे मुख्यमंत्र्यांच्या नावे आज जिल्हाधिकार्‍यांना सादर करण्यात आले.
आर्मी एक्स अँड आर्मी सर्व्हीसमन वेल्फेअर असोसिएशन कुरिहाळचे अध्यक्ष नारायण बसर्गे यांच्या नेतृत्वाखाली आज बुधवारी विविध मागण्यांचे निवेदन जिल्हाधिकाऱ्यांना सादर करण्यात आले. जिल्हाधिकाऱ्यांच्या सहायकांनी निवेदनाचा स्वीकार करून योग्य ती कार्यवाही करण्याचे आश्वासन दिले. मुख्यमंत्र्यांच्या नावे असणाऱ्या सदर निवेदनात माजी सैनिकांच्या घरांची घरपट्टी व पाणीपट्टी माफ केली जावी.
सेवानिवृत्त माजी सैनिकांसाठी ग्रामपंचायत सदस्यत्व राखीव ठेवावे. आश्रय योजनेअंतर्गत त्यांचाही लाभार्थी म्हणून विचार केला जावा आदी मागण्या नमूद करण्यात आल्या असून या मागण्यांची लवकरात लवकर पूर्तता करण्याची विनंती करण्यात आली आहे.
निवेदन सादर केल्यानंतर प्रसारमाध्यमांशी बोलताना अध्यक्ष नारायण बसर्गे म्हणाले की, देशात सर्वत्र माजी सैनिकांची पाणीपट्टी व घरपट्टी माफ केली जाते. बेळगाव महापालिका देखील ते करते. तथापि ग्रामीण भागात माजी सैनिकांकडून घरपट्टी व पाणीपट्टी वसूल केली जाते. खरेतर आमची देशसेवा लक्षात घेऊन आम्हाला सवलत दिली गेली पाहिजे. तेंव्हा आमची घरपट्टी आणि पाणीपट्टी माफ करण्याबरोबरच ग्रामपंचायतीची एक जागा आमच्यासाठी राखीव ठेवली जावी.
जेणेकरून देशसेवा केल्यानंतर सेवानिवृत्त झालेल्या आम्हा जवानांना समाज सेवा करण्याची देखील संधी मिळेल, असे बसर्गे यांनी सांगितले. याप्रसंगी आर्मी एक्स अँड आर्मी सर्व्हीसमन वेल्फेअर असोसिएशनचे उपाध्यक्ष कल्लाप्पा पाटील, प्रकाश रूटकुटे यादव, मारुती पाटील, बाळाप्पा कुट्रे, बाबू बाळेकुंद्री, महादेव मरगाळे आदी अनेक सेवानिवृत्त जवान उपस्थित होते.
