मतमोजणीमुळे उद्या शहरातील वाहतूक मार्गात असे होणार बदल

बेळगाव महानगरपालिका निवडणुकीची मतमोजणी सोमवार दि. 6 सप्टेंबर रोजी कॅम्प पोलिस स्थानक हद्दीतील एन एस पै प्राथमिक शाळेत होणार आहे. मतमोजणीवेळी मोठ्या प्रमाणात रहदारी कोंडी होण्याची शक्यता गृहीत धरून पोलीस प्रशासनाने वाहतूक मार्गात बदल केले आहेत.
सोमवार दि. 6 सप्टेंबर रोजी सकाळी सहा वाजल्यापासून ते मतमोजणी पूर्ण होईपर्यंत हे निर्बंध लागू असणार आहेत.

रहदारी मार्गातील बदल पुढीलप्रमाणे

खानापूरहून बेळगाव शहरात येणारी अवजड वाहने काँग्रेस रोडवरील मिलिटरी महादेव मंदिरापासून डाव्या बाजूला वळवून शौर्य चौक (मिलिटरी हॉस्पिटल), गांधी सर्कल, क्लब रोडमार्गे वळवण्यात आली आहेत. चन्नम्मा चौकातून खानापूरकडे जाणारी अवजड वाहने गणेश मंदिराजवळ उजवीकडे वळवून क्लब रोड, बाची क्रॉस, गांधी चौक, शौर्य चौक ,मिलिटरी महादेव मंदिरापासून वळविण्यात आली आहेत.

पिंपळ कट्टा, पाटील गल्ली, शनी मंदिर मार्गे खानापूर रोडकडे जाणारी सर्व वाहने शनी मंदिरनजीक डावीकडे वळण घेऊन कपिलेश्वर उड्डाणपूल, एसपीएम रोड, बँक ऑफ इंडिया, बसवेश्वर सर्कल, गोवा वेस मार्गे वळविण्यात आली आहेत.

निर्बंधित मार्ग

1.खानापूर रोड (मंगसुळी खुट ते गोगटे सर्कल पर्यंत)
2.इंडिपेंडंट रोड(सेंट पॉल स्कूल क्रॉसपासून गवळी गल्ली क्रॉसपर्यंत आणि हाय स्ट्रीट रस्ता)
3.बी. के. मॉडेल स्कूल रोड(पोस्टमन सर्कलपासून बीएसएनएल सर्कल पर्यंत)
उमेदवार आणि त्यांच्या एजंटांच्या वाहनाच्या पार्किंगची व्यवस्था असदखान दर्गाच्या खुल्या जागेत करण्यात आली आहे.