बेळगाव लाईव्ह | अनगोळ गणेशोत्सवात भक्तिभावाने बाप्पाच्या चरणी अर्पण केलेले निर्माल्य योग्य ठिकाणी जमा व्हावे आणि धार्मिक भावना जपत परिसर स्वच्छ राहावा, यासाठी अनगोळमध्ये सुरू करण्यात आलेली फिरते निर्माल्य कुंड सेवा यंदा दहाव्या वर्षात दाखल झाली आहे. माजी नगरसेवक विनायक गोपाळ गुंजटकर यांच्या संकल्पनेतून गेल्या दहा वर्षांपासून हा उपक्रम राबविण्यात येत आहे.
बुधवार, १७ सप्टेंबर २०२६ रोजी शिवशक्तीनगर, अनगोळ येथील सिद्धिविनायक मंदिरात नागरिकांच्या उपस्थितीत फिरत्या निर्माल्य कुंडाची पूजाअर्चा करण्यात आली. यानंतर गणेशोत्सव काळातील निर्माल्य संकलन सेवेला सुरुवात झाली.
गणपती बाप्पाच्या प्रतिष्ठापनेनंतर तिसऱ्या किंवा चौथ्या दिवसापासून फिरते निर्माल्य कुंड अनगोळमधील विविध गल्ल्यांमध्ये फिरते. नागरिकांना गाडीच्या आगमनाची माहिती मिळावी, यासाठी ध्वनिक्षेपकाची व्यवस्था करण्यात आली असून, निर्माल्य जमा करण्यासाठी दोन स्वयंसेवकांची नियुक्ती करण्यात आली आहे.
निर्माल्य रस्त्यावर न टाकता कुंडात जमा करण्याचे आवाहन
गणेशभक्तांकडून अर्पण करण्यात येणारी फुले, वस्त्रे, केळीची पाने, दुर्वा आणि पूजासाहित्य रस्त्यावर किंवा इतरत्र टाकले जाऊ नये, यासाठी ते थेट फिरत्या निर्माल्य कुंडात जमा करण्याचे आवाहन करण्यात येते. संकलित निर्माल्य पुढे महानगरपालिकेच्या कपिलेश्वर किंवा जॅकीहोंडा परिसरातील मोठ्या कुंडांमध्ये जमा केले जाते.
या उपक्रमामुळे भक्तिभावाने अर्पण केलेल्या निर्माल्याचा योग्य पद्धतीने संग्रह करण्यास मदत होत असून, गणेशभक्तांच्या धार्मिक भावनांचा सन्मान राखण्याचा प्रयत्न केला जात आहे.
‘सेवा कधी सुरू होणार?’ नागरिकांकडून विचारणा
फिरते निर्माल्य कुंड सेवेला नागरिकांकडून मिळणाऱ्या प्रतिसादाबद्दल बोलताना विनायक गुंजटकर यांनी एक अनुभव सांगितला. एखाद्या वर्षी निर्माल्य संकलनाची सेवा सुरू होण्यास एक दिवस उशीर झाला, तर विविध गल्ल्यांमधून नागरिकांचे फोन येतात. ‘तुमची निर्माल्य कुंड सेवा कधीपासून सुरू होणार? आम्ही वाट पाहत आहोत,’ अशी विचारणा केली जाते.
नागरिकांकडून मिळणारी ही आपुलकी आणि सेवेची अपेक्षा आनंद देणारी असल्याचे त्यांनी सांगितले. गणपती बाप्पाने अशीच सेवा पुढे सुरू ठेवण्यासाठी आशीर्वाद द्यावा, हीच प्रार्थना असल्याचे त्यांनी नमूद केले.
गेल्या दशकभरापासून सुरू असलेल्या या उपक्रमातून गणेशोत्सवातील भक्ती, स्वच्छता आणि सामाजिक सहभाग यांना एकत्र आणण्याचा प्रयत्न केला जात आहे.
उपस्थिती : गजानन सुरतेकर, शंभू जाधव, विशाल पिसे, प्रतीक शिंदे, सूरज जाधव, स्वामी चरणटीमठ, मारुती तळवार, सायली गुंजटकर, शोभा पाटील, कल्पना पवार, सविता पिसे, स्नेहा आदी नागरिक उपस्थित होते.
