बेळगाव दक्षिण क्षेत्रांमध्ये जे आणखी एक सब रजिस्ट्रार कार्यालय सुरू करण्यात येणार आहे, ते तेथे सुरू न करता जिल्हाधिकारी कार्यालय आवारातच सुरू करावे, अशी जोरदार मागणी समस्त वकीलवर्गाने केली आहे.
बेळगाव बार असोसिएशनचे उपाध्यक्ष ॲड. गजानन पाटील आणि सचिव ॲड. आर. सी. पाटील यांच्या नेतृत्वाखालील वकिलांनी आज शनिवारी सकाळी उपरोक्त मागणीचे निवेदन जिल्हाधिकारी एम. जी. हिरेमठ यांना सादर केले जिल्हाधिकार्‍यांनी निवेदनाचा स्वीकार करून योग्य ती कार्यवाही करण्याचे आश्वासन दिले आहे.
प्रशासकीय कामकाजात सुधारणा व्हावी या उद्देशाने बेळगाव सब रजिस्टर कार्यालयाचे दोन भाग करण्यात येणार असून दुसरी शाखा बेळगाव दक्षिण मतक्षेत्रात सुरू करण्याच्या दृष्टीने हालचाली सुरू झाल्या आहेत. मात्र त्या ठिकाणी दुसरे सब रजिस्ट्रार कार्यालय सुरु झाल्यास नागरिकांची गैरसोय होऊन त्यांना त्रास होणार आहे. तेंव्हा जिल्हाधिकारी कार्यालय आवारातच दुसरे सब रजिस्ट्रार कार्यालय सुरु केल्यास नागरिकांसाठी ते सोयीचे होणार आहे, अशा आशयाचा तपशील निवेदनात नमूद आहे.
शहरातील सब रजिस्ट्रार कार्यालयात अर्थात उप नोंदणी कार्यालयामध्ये मोठ्या प्रमाणात गर्दी होत असते. त्या तुलनेत प्रशासकीय काम मात्र संथ गतीने होत असते. हे टाळण्यासाठी बेळगाव सब रजिस्टर कार्यालयाचे बेळगाव दक्षिण आणि बेळगाव उत्तर असे दोन विभाग करण्याचा निर्णय घेण्यात आला आहे. हे विभाग करून त्याप्रमाणे गावे आणि गल्ल्यांची विभागणी केली जाणार आहे.
बेळगाव दक्षिणमधील कार्यालय गोवावेस येथील महापालिकेच्या व्यापारी संकुलात होण्याची शक्यता आहे. मात्र याला बेळगावच्या वकिलांनी तीव्र विरोध केला आहे. सब रजिस्टर कार्यालय हे न्यायालय आणि जिल्हाधिकारी कार्यालयाच्या आवारातच असले पाहिजे, असे समस्त वकिलांचे मत आहे. त्यानुसार त्यांनी दुसरे सब रजिस्टर कार्यालय दक्षिण मतदारसंघात सुरू न करता जिल्हाधिकारी कार्यालय आवारात सुरू करावे, अशी मागणी केली आहे.
