लोकसभा पोटनिवडणुकीच्या पार्श्वभूमीवर आज तालुका महाराष्ट्र एकीकरण समितीची बैठक बोलाविण्यात आली होती. या बैठकीत लोकसभा निवडणुकीत समिती उमेदवाराला भक्कम पाठिंबा देण्याचा निर्धार करण्यात आला. बैठकीच्या अध्यक्षस्थानी माजी आमदार मनोहर किणेकर होते. मराठा मंदिर येथे आयोजित करण्यात आलेल्या बैठकीत लोकसभा पोटनिवडणुकीसाठी मध्यवर्ती जो उमेदवार घोषित करेल, त्या उमेदवाराच्या पाठीशी उभं राहून सीमाभागातील मराठी भाषिकांचे वर्चस्व दाखविणे गरजेचे असल्याचा ठराव बैठकीत मांडण्यात आला.
नुकत्याच झालेल्या मध्यवर्ती समिती बैठकीत युवा नेतृत्वाला संधी देण्यासंदर्भात चर्चा करण्यात आली होती. यानुसार ज्येष्ठांच्या मार्गदर्शनाखाली युवा नेतृत्वाला संधी देण्यात येणार आहे. मध्यवर्ती समिती उमेदवार निवडीसंदर्भात जो निर्णय घेईल त्या निर्णयाला तालुका आणि शहर समिती पाठिंबा देईल. समिती उमेदवाराला शहर, ग्रामीण आणि तालुक्यातून अधिकाधिक मते मिळावीत, यासाठी प्रत्येकाने प्रयत्न करणे गरजेचे असल्याचे मत बैठकीत व्यक्त करण्यात आले.
शहर, ग्रामीण आणि तालुका भागातील सर्वाधिक मते हि समिती उमेदवाराला मिळावीत, यासाठी प्रत्येकाने प्रयत्न करावे. उमेदवार कोणताही असो, उमेदवाराबाबतीत कोणतीही तक्रार न करता त्या उमेदवाराला अधिकाधिक मते कशी मिळवून देता येतील, याचा प्रत्येकाने विचार करणे आवश्यक आहे. समितीचा उमेदवार हा सीमाभागातील प्रत्येक मराठी भाषिकांचे प्रतिनिधित्व करणारा आहे.
आगामी विधानसभा निवडणुकीसाठी मराठी भाषिकांना या उमेदवाराच्या माध्यमातून गेल्या १० वर्षांपूर्वी गमावलेली सत्ता पुन्हा प्रस्थापित करण्याची संधी मिळणार आहे. गेल्या कित्येक वर्षात समितीमध्ये निर्माण झालेले गट बाजूला सारून लोकसभा निवडणुकीत एकसंघपणे उभे राहणे गरजेचे असल्याचे मत उपस्थितातून व्यक्त करण्यात आले.
या बैठकीला माजी आमदार मनोहर किणेकर, एल. आय. पाटील, जिल्हा पंचायत सदस्या माधुरी हेळवे, जिल्हा पंचायत सदस्या सरस्वती पाटील, तालुका पंचायत सदस्य रावजी पाटील, तालुका पंचायत सदस्य वसंत सुतार, ग्रामपंचायत सदस्य यांच्यासह शेकडो कार्यकर्ते बैठकीला उपस्थित होते.
