वाढत्या कोरोना रुग्णांच्या संख्येमुळे आरोग्य विभागाने अँटीबॉडीज तपासणीसाठी सर्वेक्षण करण्याचे ठरविले आहे. बेळगावमध्ये दररोज ४०० हुन अधिक जणांचे अहवाल पॉझिटिव्ह येत आहेत, तर राज्यात हजारोंच्या संख्येने कोरोनाग्रस्त रुग्ण आढळून येत आहेत. यामुळे कोरोनाचा प्रसार समुदायात होत आहे का? याची तपासणी आता आरोग्य विभागाच्यावतीने करण्यात येत आहे.
येत्या दोन दिवसात संपूर्ण राज्यात हे सर्वेक्षण करण्यात येणार असून बेळगावमधील जवळपास ४८५ सुदृढ नागरिकांचे स्वॅब तसेच रक्ताचे नमुनेही घेण्यात येणार आहेत. हे नमुने रॅपिड तपासणीसाठी बंगळूरला पाठविण्यात येणार आहेत. या तपासणीतून अँटीबॉडीज तयार झाली आहेत का? हे पाहण्यासाठी सर्वेक्षण हाती घेण्यात येणार आहे.
या तपासणीसाठी १८ वर्षांवरील सुदृढ नागरिकांची निवड करण्यात येणार असून समुदायातून कोरोनाचा फैलाव कितपत झाला आणि त्याचा प्रतिकार करण्यासाठी शरीरात अँटीबॉडीज तयार झाल्या आहेत का, याचा अभ्यास करण्यात येणार असून लवकरच या तपासणीच्या नियमांत आणखी बदल करण्यात येणार आहेत.
स्वॅब तपासणीसाठी यापुढील काळात सक्ती हटविली जाण्याची शक्यता असून स्वयंप्रेरणेने पुढाकार घेणाऱ्या नागरिकांचीच स्वॅब तपासणी करण्यात येणार आहे. परंतु ६० वर्षांवरील नागरिकांसाठी स्वॅब तपासणी सक्तीची असणार आहे. यासंबंधी लवकरच शासकीय निर्णय जाहीर होण्याची शक्यता सूत्रांकडून वर्तविली जात आहे.
