अलीकडच्या काळात सर्वत्र झाडे लावा झाडे जगवा, प्लांट ट्रीज फॉर अ बेटर वर्ल्ड, गो -ग्रीन नो ट्री नो फ्युॅचर आदी घोषणा दिल्या जात आहेत. परंतु बहुदा या घोषणा फक्त सर्वसामान्य जनतेसाठी असाव्यात. सरकार सरकार व प्रशासन मात्र झाडे तोडू शकते आणि मधला माणूस आपले उखळ पांढरे करून घेऊ शकतो. त्यांना कोणीही जाब विचारू शकत नाही. सध्या कॅम्प परिसरात हा प्रकार घडत आहे.
कॅम्प परिसर हा तेथील निसर्गसौंदर्य आणि हवेशीर वातावरणासाठी ओळखला जातो. परंतु अलीकडे येथील झाडांची लाकूड माफियांकडून कत्तल केली जात आहे. याबाबत जाब विचारल्यास तुम्हाला वरून तसा आदेश मिळाला आहे असे सांगितले जात आहे.
येथील अनेक झाडे ज्यांचा रहदारीस अडथळा होत नाही किंवा ज्यांचा इलेक्ट्रिक वायर दुरान्वये संबंध येत नाही अशी झाडे फक्त लाकडासाठी तोडली जात आहेत. कॅन्टोन्मेंट बोर्डाने एकाच प्रमुख रस्त्याला अवास्तव प्रसिद्ध केले आहे. या रस्त्याचे निसर्गसंपन्न रस्ता म्हणून प्रत्येक जण फोटो काढत असतो. परंतु याच रस्त्याचा जवळील बरीच झाडे तोडली जात आहेत.
तेंव्हा सरकार आणि प्रशासन विशेषकरून कँटोन्मेंट बोर्डाने याकडे गांभीर्याने लक्ष देऊन सदर वृक्षतोड त्वरित थांबवावी आणि वृक्षांचे संवर्धन करावे, अशी मागणी केली जात आहे.
