बेळगाव लाईव्ह : बेळगाव महानगरपालिकेच्या नगरसेवकांसाठी आणखी एका अभ्यास दौऱ्याला मंजुरी देण्यात आली असून, यावेळी दिल्ली आणि श्रीनगरला भेट दिली जाणार आहे. ‘स्वच्छ भारत अभियान २’ अंतर्गत उपलब्ध असलेल्या निधीतून या दौऱ्याचा खर्च केला जाणार आहे.
महानगरपालिकेच्या सर्वसाधारण बैठकीत या प्रस्तावाला बिनविरोध मंजुरी देण्यात आली. विजयादशमी संपल्यानंतर २४ ऑक्टोबर रोजी हा दौरा आयोजित केला जाण्याची शक्यता आहे. या भेटीदरम्यान नगरसेवक दोन्ही शहरांमधील स्वच्छता यंत्रणा, घनकचरा व्यवस्थापन, नागरी सुविधा आणि शहर विकास प्रकल्पांचा अभ्यास करतील.
सध्याच्या नगरसेवकांचा हा चौथा अभ्यास दौरा आहे. यापूर्वी नगरसेवकांनी चंदीगड, इंदूर आणि जयपूर या शहरांना भेटी दिल्या होत्या. ऑक्टोबर २०२५ मध्ये ६० लाख रुपयांच्या स्वच्छ भारत निधीतून नगरसेवकांनी इंदूरमधील कचरा व्यवस्थापनाचा अभ्यास केला होता. त्यानंतर आरोग्य अधिकारी आणि स्वच्छता कर्मचाऱ्यांच्या ३४ सदस्यांच्या पथकानेही इंदूरचा दौरा केला होता.
बैठकीत मुख्य लेखाधिकारी मंजुनाथ बिळगीकर यांनी या दौऱ्यासाठी उपलब्ध असलेल्या निधीची माहिती सभागृहाला दिली. यापूर्वी अनेक अभ्यास दौरे झाले असल्याने, या नव्या दौऱ्यानंतर शहरात प्रत्यक्ष काही सकारात्मक सुधारणा होणार की हा दौरा केवळ औपचारिक ठरणार, असा सवाल नागरिक उपस्थित करत आहेत.
