बेळगाव लाईव्ह :बेळगाव जिल्ह्यातील प्रधानमंत्री नूतन 15 कलमी अल्पसंख्यांक कल्याण कार्यक्रमाबाबतची सर्वसमावेशक आढावा बैठक काल पार पडली. यावेळी कर्नाटक राज्य अल्पसंख्याक आयोगाचे अध्यक्ष यू. निसार अहमद यांनी अधिकाऱ्यांना सर्व योजनांची प्रभावी आणि वेळेवर अंमलबजावणी सुनिश्चित करण्याचे निर्देश दिले.
जिल्हाधिकारी कार्यालयाच्या सभागृहामध्ये प्रधानमंत्री नूतन 15 कलमी अल्पसंख्यांक कल्याण कार्यक्रमाच्या 2025 -26 मधील तिसऱ्या व चौथ्या त्रैमासिक जिल्हास्तरीय विकास आढावा बैठकीच्या अध्यक्ष स्थानावरून माहिती देताना, अहमद यांनी अल्पसंख्याकांसाठी असलेले सरकारी लाभ प्रत्येक पात्र लाभार्थ्यापर्यंत विनाविलंब पोहोचले पाहिजेत, यावर जोर दिला.
शिक्षणाला सर्वोच्च प्राधान्य देत अहमद यांनी शिक्षण विभागाच्या अधिकाऱ्यांना इयत्ता पहिलीच्या प्रवेशासाठी पात्र अंगणवाडी मुलांची ओळख पटवण्यासाठी महिला व बाल विकास विभागाशी समन्वय साधण्याचे निर्देश दिले. कोणत्याही परिस्थितीत कोणत्याही मुलाला शिक्षणापासून वंचित ठेवू नये, यावर त्यांनी भर दिला.
प्रशासनाला घरोघरी जाऊन सर्वेक्षण करून, विशेषतः अल्पसंख्याक समाजातील शाळाबाह्य मुलांना ओळखण्याचे आणि त्यांची नोंदणी सुनिश्चित करण्याचे निर्देश त्यांनी दिले. राज्यातील कोणतेही मूल शिक्षणापासून वंचित राहू नये, हे सरकारचे ध्येय आहे, याचा त्यांनी बैठकीत पुनरुच्चार केला.
तसेच अधिकृत ओळख प्रणालीद्वारे स्थलांतरित मुलांचा शोध घेऊन त्यांना पुन्हा शाळांमध्ये दाखल करण्याचे आवाहनही केले. अहमद यांनी यांनी अधिकाऱ्यांना शाळांमधील स्वच्छता सुविधांची दुरुस्ती करण्याचे निर्देश दिले आणि प्रत्यक्ष परिस्थितीचा आढावा घेण्यासाठी आयोगाचे सदस्य अचानक भेटी देतील, असा इशाराही दिला.
अध्यक्षांनी तरुणांमधील कौशल्ये ओळखून कौशल्य विकासाद्वारे त्यांना योग्य व्यावसायिक प्रशिक्षण देण्याच्या गरजेवर भर दिला. त्यांनी बांधकाम कामगारांमध्ये उपलब्ध कल्याणकारी योजनांबद्दल जागरूकता निर्माण करण्याचे निर्देशही दिले.
झोपडपट्टी भागातील दिव्यांग व्यक्तींना लाभ मिळत नसल्याबद्दल चिंता व्यक्त करत, प्रत्येक पात्र व्यक्ती सरकारी योजनांअंतर्गत समाविष्ट आहे याची खात्री करण्यासाठी यू. निसार अहमद यांनी सर्व क्षेत्रांमध्ये व्यापक सर्वेक्षण करण्याचे आदेश दिले.
