बेळगाव लाईव्ह: दरवर्षीप्रमाणे यंदाही महाराष्ट्र एकीकरण समितीच्या वतीने कंग्राळी खुर्द येथे येत्या 17 जानेवारी रोजी आयोजित हुतात्मा अभिवादन कार्यक्रमास मोठ्या संख्येने उपस्थित राहण्याचा तसेच युवा समिती सीमाभाग आयोजित मराठी सन्मान यात्रेला पाठिंबा देण्याचा निर्णय घेण्यात आला
. याशिवाय मध्यवर्ती महाराष्ट्र एकीकरण समितीच्या आगामी डांबर मोर्चामध्ये संपूर्ण ताकदीनिशी सहभागी होण्याचा ठराव आज गुरुवारी झालेल्या बेळगाव तालुका महाराष्ट्र एकीकरण समितीच्या बैठकीत एकमताने मंजूर करण्यात आला.
खानापूर रोडवरील रेल्वे ओव्हर ब्रिज नजीक असलेल्या मराठा मंदिरात ही बैठक पार पडली. बैठकीच्या अध्यक्षस्थानी समितीचे अध्यक्ष व माजी आमदार मनोहर किनेकर होते. यावेळी व्यासपीठावर सचिव एम. जी. पाटील, आर. एम. चौगुले, लक्ष्मण होनगेकर, रामचंद्र मोदगेकर, मोनाप्पा पाटील व विठ्ठल पाटील उपस्थित होते.
बैठकीच्या प्रारंभी महाराष्ट्र एकीकरण समितीच्या दिवंगत कार्यकर्त्यांना श्रद्धांजली अर्पण करण्यात आली. त्यानंतर सचिव एम. जी. पाटील यांनी बैठकीचा उद्देश स्पष्ट केला.
प्रास्ताविकात बोलताना माजी आमदार मनोहर किनेकर यांनी 17 जानेवारी 1956 रोजी सीमा प्रश्नासंदर्भात झालेल्या आंदोलनात पोलिसांच्या गोळीबारात पाच जण हुतात्मा झाल्याचा इतिहास उपस्थितांसमोर मांडला. सीमाप्रश्नी सध्या न्यायालयीन लढाई सुरू असली तरी रस्त्यावरचा संघर्षही तितकाच महत्त्वाचा असून तो अधिक तीव्रतेने चालू ठेवण्याची गरज आहे, असे त्यांनी स्पष्ट केले.
येत्या 17 जानेवारी रोजी सकाळी 9 वाजता कंग्राळी खुर्द येथे आयोजित हुतात्मा अभिवादन कार्यक्रमास सर्व पदाधिकारी, कार्यकर्ते व नागरिकांनी मोठ्या संख्येने उपस्थित रहावे, असे आवाहन त्यांनी केले.
यावेळी आर. एम. चौगुले, रामचंद्र मोदगेकर, शिवाजी खांडेकर, दीपक पावशे व लक्ष्मणराव होनगेकर आदी वक्त्यांनी आपले विचार मांडत सीमा प्रश्नावरील लढ्याला अधिक व्यापक रूप देण्याची आवश्यकता व्यक्त केली.
चर्चेअंती खालील ठराव एकमताने मंजूर करण्यात आले:
17 जानेवारी रोजी कंग्राळी खुर्द येथे होणाऱ्या हुतात्मा अभिवादन कार्यक्रमास बहुसंख्येने उपस्थित राहणे. मराठी सन्मान यात्रेला जाहीर पाठिंबा देणेमध्यवर्ती महाराष्ट्र एकीकरण समितीच्या आगामी डांबर मोर्चामध्ये संपूर्ण ताकदीनिशी सहभाग नोंदवणे,बैठकीस महाराष्ट्र एकीकरण समितीचे पदाधिकारी व कार्यकर्ते मोठ्या संख्येने उपस्थित होते.
