बेळगाव लाईव्ह: बेळगावच्या डेली व्ह्यू न्यूज आणि नवउर्जा या दिवाळी अंकाने यंदा सीमाभाग ओलांडून थेट मुंबईत मराठी सांस्कृतिक एकतेचा संदेश दिला आहे.
या दिवाळी अंकाचे प्रकाशन मुंबई येथे सुप्रसिद्ध अभिनेते शांतनू मोघे (संभाजी, राव रंभा, तसेच छत्रपती शिवाजी महाराजांची भूमिकेमुळे प्रसिद्ध) यांच्या हस्ते करण्यात आले.
या प्रसंगी राणी मल्लम्मा चित्रपटाचे निर्माते प्रशांत पाटील (बेळगाव), डेली व्ह्यू न्यूज व नवउर्जा चे संपादक महादेव पवार, तसेच श्री लक्ष्मीनारायण वधू-वर केंद्राचे संस्थापक आणि नवउर्जा चे उपसंपादक यलोजीराव पवार (सर) उपस्थित होते.अभिनेते शांतनू मोघे यांनी अंकातील नवोदित लेखकांचे लेख वाचून समाधान व्यक्त केले.
“अशाप्रकारचे सृजनशील उपक्रम मराठी संस्कृतीला नवे बळ देतात,” असे उद्गार त्यांनी काढत दिवाळी अंकाच्या यशासाठी शुभेच्छा दिल्या.निर्माते प्रशांत पाटील यांनी अंकात समाविष्ट केलेल्या ‘विवाह सोहळ्यातील आचारसंहिता’ या विशेष विभागाचे कौतुक केले.
या अंकाच्या यशस्वी प्रकाशनासाठी कला श्री ग्रुप चे संस्थापक प्रकाश डोळेकर, विविध जाहिरातदार व सहकाऱ्यांचे मनःपूर्वक आभार मानण्यात आले. बेळगावचा दिवाळी अंक मुंबईत प्रकाशित झाल्याने मराठी साहित्यविश्वात आनंदाचे वातावरण निर्माण झाले आहे.
