बेळगाव लाईव्ह :रॉटवेलर कुत्रा बाळगताय सावधान… कारण कंग्राळी खुर्द येथील एक सेवानिवृत्त लष्करी अधिकारी घरामध्ये मुलाप्रमाणे संगोपन करून मोठ्या केलेल्या रॉटवेलर कुत्र्याच्या जीवघेण्या हल्ल्यात गंभीर जखमी झाल्याची घटना घडली आहे.
कंग्राळी खुर्द येथील रहिवासी सेवानिवृत्त सुभेदार पुंडलिक गौंडवाडकर असे गंभीर जखमी झालेल्या लष्करी अधिकाऱ्याचे नांव आहे. गौंडवाडकर हे खूप वर्षापासून आपल्या घरी रॉटवेलर कुत्रा बाळगतात. हे रॉटवेलर लहान पिल्लू असल्यापासून पुंडलिक गौंडवाडकर त्याचे अगदी आपल्या पोटच्या मुलासारखे संगोपन करत आहेत.
त्यामुळे कुटुंबातील एक सदस्य असल्याप्रमाणे त्याची वाढ झाली. अंगाखांद्यावर खेळणारा हा कुत्रा पायाला काटा लागल्याने लंगडत होता. त्यामुळे गौंडवाडकर यांनी त्याला जवळ घेऊन पायाचा काटा काढण्याचा प्रयत्न केला. तेंव्हा त्या कुत्र्याने अचानक गौंडवाडकर यांच्यावर हल्ला करून त्यांच्या हाताचा चावा घेतला.
त्याच्या जबड्याची पकड इतकी मजबूत होती सर्व परिवाराने मिळून गौंडवाडकर यांना सोडवण्याचा प्रयत्न केला तरी तो कुत्रा आपल्या जबड्यात पकडलेला त्यांचा हात सोडण्यास तयार नाही. अखेर 10 मिनिटाच्या थरारानंतर त्या रॉटवेलर कुत्र्याला साखळी लावून संपूर्ण ताकदीने ओढण्यात आले.
त्यावेळी हाताचा मासाचा लचका घेऊनच कुत्र्याने हात सोडला. त्यानंतर अक्षरशः रक्तबंबाळ अवस्थेत सेवानिवृत्त सुभेदार पुंडलिक गौंडवाडकर यांना उपचारासाठी केएलई हॉस्पिटलमध्ये दाखल करण्यात आले.
सध्या त्यांच्यावर उपचार सुरू असून त्यांची प्रकृती धोक्यात बाहेर आहे. लष्करामध्ये सेवा बजावली असल्यामुळे प्रचंड सहनशक्तीसह धाडसाने खडतर परिस्थितीवर मात करण्याची सवय कुत्र्याच्या हल्ल्यात गौंडवाडकर यांच्या कामी आली. खूप धाडसाने व शांतपणे मरण यातना सहन करत त्यांनी कुत्र्याच्या हल्ल्यातून आपली सोडवणूक करून घेतली.