बेळगाव लाईव्ह : आनंद, राग, मनातील गुपित व्यक्त करण्यासाठी हक्काची मैत्री असली की आयुष्य रंगतदार होतं, हा आशय अधोरेखित करणारा बेळगावच्या वाणीश्री फिल्म प्रोडक्शनचा ‘ऑल इज वेल’ हा मराठी चित्रपट येत्या दि. 27 जून 2025 रोजी सर्व चित्रपटगृहात प्रदर्शित होणार आहे अशी माहिती देऊन हा चित्रपट म्हणजे सहकुटुंब अनुभवायला मिळणारी मनोरंजनाची अफलातून ट्रीट असणार आहे, असा विश्वास या चित्रपटाचे निर्माते असलेल्या बेळगावच्या अमोद मुचंडीकर यांनी व्यक्त केला.
शहरामध्ये नुकत्याच आयोजित पत्रकार परिषदेमध्ये ते बोलत होते. चित्रपट निर्माते मुचंडीकर दिलेल्या माहितीनुसार, मैत्री ही अशी गोष्ट आहे की जी कोणाबरोबरही होऊ शकते आणि तिला वय, भाषा, धर्म, वर्ण कशाचीही मर्यादा नसते. अशाच एका मैत्रीची अनोखी कहानी ‘ऑल इज वेल’ या मराठी चित्रपटातून मराठी रुपेरी पडद्यावर दिसणार आहे.
अमर, अकबर आणि अँथनी यांच्या मैत्रीची ही गोष्ट आहे. मनोरंजन आणि मस्तीचे जबरदस्त पॅकेज असलेल्या ‘ऑल इज वेल’ चित्रपटाचे दिग्दर्शन योगेश जाधव यांचे असून लेखन प्रियदर्शन जाधव यांनी केले आहे. बेळगावकर असलेल्या निर्माते अमोद मुचंडीकर आणि वाणी हालप्पणवर यांनी या चित्रपटाची निर्मिती केली आहे.
त्याचप्रमाणे मल्लेश सोमनाथ मरूचे आणि विनायक पट्टणशेट्टी हे या चित्रपटाचे सहनिर्माते, तर निर्मिती पर्यवेक्षक दीपक सांबरेकर व अमित जाधव हे आहेत. आनंद, राग, मनातील गुपित व्यक्त करण्यासाठी हक्काची मैत्री असली की आयुष्य रंगतदार होतं, हा आशय ‘ऑल इज वेल’ चित्रपटातून अधोरेखित करण्यात आला आहे. विशेष म्हणजे या चित्रपटाद्वारे प्रियदर्शन जाधव, अभिनय बेर्डे व रोहित हळदीकर हे जबरदस्त त्रिकूट पहिल्यांदाच एकत्र आले आहे. मैत्रीसाठी काहींही करायला तयार असणाऱ्या या तीन मित्रांच्या आयुष्यात अशा घटना घडतात की त्यांच्या आयुष्यात खळबळ उडते.
मात्र न डगमगता ते तीनही मित्र परिस्थितीला सामोरे जात एकत्र उभे ठाकतात. आपल्यातील मैत्री जपत हे तीन मित्र फसवणुकीचा कसा निकाल लावतात याची धमाल दिग्दर्शक योगेश जाधव यांनी ऑल इज वेल चित्रपटातून दाखवली आहे. सदर चित्रपटात सयाजी शिंदे, अभिजीत चव्हाण नक्षत्रा मेढेकर, सायली फाटक, माधव वझे, अजय जाधव, अमायरा गोस्वामी, दिशा काटकर आदी कलाकारांच्याही भूमिका आहेत.
‘ऑल इज वेल’ चित्रपटाचे कार्यकारी निर्माते संजय ठुबे असून संगीत चिनार -महेश, अर्जुन -जन्या यांचे आहे. छायांकन मयुरेश जोशी तर संकलन अथश्री ठुबे यांचे आहे. नृत्यदिग्दर्शक राजेश बिडवे यांचे, तर साहसदृश्य अजय ठाकूर पठाणी याची आहेत. वेशभूषा कीर्ती जंगम आणि रंगभूषा अतुल शिदे यांनी केली आहे. गीतकार मंदार चोळकर असून गायक रोहित राऊत आणि अपेक्षा दांडेकर हे आहेत.
सदरची माहिती देताना निर्माते अमोद मुचंडीकर यांनी तरुणाईची कथा असलेला ‘ऑल इज वेल’ हा चित्रपट कलाकारांचा सुरेख अभिनय, सुमधुर संगीत आणि नेत्रसुखद सादरीकरणाने सजला असून या चित्रपटाद्वारे रसिकांना सहकुटुंब हास्याची मेजवानी मिळणार असल्याचे विश्वासाने सांगितले. पत्रकार परिषदेस निर्मात्या वाणी हालप्पणवर यांच्यासह मल्लेश मरुचे, विनायक पट्टणशेट्टी, दीपक सांबरेकर, अमित जाधव आदी उपस्थित होते.
