बेळगाव लाईव्ह :गतवर्षी झालेल्या समाधानकारक पावसामुळे बेळगाव शहराला पिण्याच्या पाण्याचा पुरवठा करणाऱ्या राकसकोप जलाशयात सध्या मे महिन्यातही समाधानकारक पाणी साठा उपलब्ध आहे. मृतसाठ्याची पातळी गाठण्यासाठी अद्याप जलाशयात 10 फूट पाणी उपलब्ध असून जे शहराला दोन महिने पुरेल इतके पुरेसे आहे.
गतवर्षी झालेल्या समाधानकारक पावसामुळे राकसकोप जलाशय पूर्ण क्षमतेने भरले होते. या जलाशयातील अतिरिक्त पाण्याचा विसर्ग मार्कंडेय नदीमध्ये करण्यात आला होता. दोन वेळा अतिरिक्त पाणी मार्कंडेय नदीत सोडण्यात आले होते. याखेरीस अधून मधून वळीवाचा पाऊस जलाशय परिसरात होत आहे.
त्यामुळे यंदा गतवर्षीच्या तुलनेत राकसकोप जलाशयाची पातळी समाधानकारकरीत्या टिकून आहे. मृतसाठ्याची (डेड स्टोअरेज) पातळी गाठण्यासाठी अद्याप जलाशयात 10 फूट पाणी उपलब्ध असल्यामुळे मे महिन्याअखेर पर्यंत आणि त्यानंतर कदाचित जून मध्ये देखील बेळगाव शहराला पाण्याची चिंता जाणवणार नाही, असा दावा एल अँड टी कंपनीच्या अधिकाऱ्यांनी केला आहे. तथापि आगामी पावसाळी मोसम उशिरा सुरू झाल्यास समस्या निर्माण होण्याची शक्यता आहे.
गतवर्षी उन्हाळ्यात राकसकोप जलाशयाची पाणी पातळी मोठ्या प्रमाणात खालावली होती. त्याचबरोबर मान्सूनने देखील उशिरा साथ दिल्यामुळे जून महिन्यात मृतसाठ्यातील पाण्याचा उपसा करण्याची वेळ आली होती.
त्या तुलनेत यंदा राकसकोप व हिडकल जलाशयात समाधानकारक पाणीसाठा असल्याचे एल अँड टी कंपनीच्या अधिकाऱ्यांनी सांगितले आहे.
त्याचप्रमाणे शहराला सुरळीतपणे पाणीपुरवठा करण्यासाठी एल अँड टी प्रयत्नशील असून नागरिकांनी पाणी बचत करून सहकार्य करावे, असे आवाहनही केले आहे.
