बेळगाव लाईव्ह :कर्नाटकाच्या जोखडात असलेला मराठी सीमाभाग लवकरात लवकर महाराष्ट्रात सामील करण्यासाठी आपण प्रयत्न करावेत असे आवाहन मध्यवर्ती महाराष्ट्र एकीकरण समितीच्या वतीने कोल्हापूरचे खासदार आदरणीय छत्रपती शाहू महाराज यांना बुधवारी करण्यात आली.
ज्योती महाविद्यालयामध्ये एक कार्यक्रमाप्रसंगी खासदार छत्रपती शाहू महाराज आले असताना त्यांची मध्यवर्ती महाराष्ट्र एकीकरण समितीच्या शिष्टमंडळाने भेट घेतली.
गेल्या ६८ वर्षापासून कर्नाटकाच्या कानडी वरवंट्याखाली सीमाभाग आहे. येथील मराठी भाषिकांवर दिवसेंदिवस कानडी वरवंटा अधिक होत आहे. येथील दुकानावरील व सार्वजनिक फलकावरील दिवसेंदिवस कानडी सक्ती तीव्र होत आहे. यामुळे मराठी भाषिकांची समस्या दिवसेंदिवस वाढतच आहे.
सीमाप्रश्न हा न्यायप्रविष्ठ आहे, यासाठी महाराष्ट्र सरकार व सीमावासियांच्या वतीने हा प्रश्न गेल्या वीस वर्षांपूर्वी सर्वोच्च न्यायालयात दाखल करण्यात आला आहे. सदर न्यायालयीन लढाई जिंकण्यासाठी व येथील मराठी भाषिकाना न्याय देण्यासाठी छत्रपती शाहू महाराजांनी याचा पाठपुरावा करावा व लोकसभेत मराठी भाषिकावरील अन्याय विरोधात आवाज उठवावा,असे आवाहन मध्यवर्ती महाराष्ट्र एकीकरण समितीचे कार्याध्यक्ष माजी आमदार मनोहर किनेकर चिटणीस माजी महापौर मालोजी अष्टेकर व खजिनदार प्रकाश मरगाळे यांनी खासदार छत्रपती शाहू महाराजांना केले.
यावेळी छत्रपती शाहू महाराज म्हणाले की हा सीमाप्रश्न न्यायप्रविष्ठ असून गेल्या अनेक वर्षांपासून येथील मराठी जनता स्वतःच्या माय मराठी राज्यात जाण्यासाठी आत्मीयतेने लढत आहे.सदर प्रश्नासाठी मी खासदार झाल्यापासून माझ्या वतीने महाराष्ट्र मुख्यमंत्री एकनाथ शिंदे व संसदेत या प्रश्नाचे वेळोवेळी लक्ष वेधील, तसेच येथील मराठी भाषिकांना न्याय मिळवून देण्यासाठी लवकरात लवकर हा प्रश्न सोडवण्यासाठी प्रयत्न करू, असे आश्वासन त्यांनी मध्यवर्ती महाराष्ट्र एकीकरण समितीच्या शिष्टमंडळालि दिले.
यावेळी मध्यवर्ती महाराष्ट्र एकीकरण समितीचे कार्याध्यक्ष माजी आमदार मनोहर किनेकर, चिटणीस मालोजी अष्टेकर, खजिनदार प्रकाश मरगाळे, मध्यवर्ती महाराष्ट्र एकीकरण समितीचे सदस्य अँड राजाभाऊ पाटील, अँड एम जी पाटील, रावजी पाटील,रामचंद्र मोदगेकर, आर एम चौगुले, मनोहर संताजी, शुभम शेळके, लक्ष्मण होणगेकर, गोपाळ पाटील, प्रकाश अष्टेकर,पांडू पट्टण, अँड सुधीर चव्हाण, अँड अमर येळ्ळूरकर, दिगंबर पवार,नेताजी जाधव, दीपक पावशे, मदन बामणे,नारायण सांगावकर, नीलश शिंदे, आदी महाराष्ट्र एकीकरण समितीचे कार्यकर्ते उपस्थित होते.
