Friday, July 19, 2024

/

निवडणुकीनंतर सुरु झाले जन्म-मृत्यू दाखल्याचे वितरण

 belgaum

बेळगाव लाईव्ह : लोकसभा निवडणुकीसाठी आचारसंहिता जाहीर झाल्यानंतर दीड – पावणेदोन महिन्यांपासून महानगरपालिका कर्मचारी निवडणुकीच्या कामात व्यस्त होते. परिणामी मनपाच्या कामकाजावर याचा परिणाम दिसून आला.

७ तारखेला लोकसभा निवडणुकीच्या मतदानानंतर हळूहळू सर्व कामकाज पूर्वपदावर येत असून जन्म आणि मृत्यू दाखल्याचे वितरण गुरुवारपासून सुरू झाले आहे.

प्रत्येक कार्यालयीन कामकाजासाठी जन्म तसेच मृत्यू दाखला महत्वाचा आहे. या दाखल्यानंतरच विविध सरकारी कामकाज चालते. शाळेतील प्रवेशासह इतर कामांसाठी जन्म दाखल्याची अत्यावश्यक गरज आहे. याचप्रमाणे वारसा असो किंवा इतर मालमत्ता खरेदी-विक्री, तसेच कुटुंबीयांच्या नावावर करताना मृत्यू दाखल्याची गरज असते. त्याशिवाय ही कोणतीच कामे मार्गी लागणे अशक्य असते. परिणामी दाखले मिळविण्यासाठी साऱ्यांचीच धडपड सुरू आहे.

लोकसभा निवडणुकीच्या कामामध्ये गेल्या दीड महिन्यापासून मनपा कर्मचारी गुंतल्याने मनुष्यबळ कमी पडले. यामुळे सर्वच कामकाज प्रलंबित राहिले. आता मतदान प्रक्रिया पूर्ण झाली असून एक दिवसाच्या विश्रांतीनंतर गुरुवारी हे सर्व कर्मचारी पुन्हा हजर झाले आहेत. सकाळपासूनच जन्म आणि मृत्यू दाखल्याच्या वितरणाचे काम सुरू झाले. मात्र सर्व्हरडाऊन होत असल्यामुळे समस्या निर्माण झाली.

सहा दिवसांपासून बंद असलेल्या या कामाला सुरुवात झाली असली तरी सर्व्हर डाऊनचा फटका सहन करावा लागत आहे. अधिक गर्दी असल्यामुळे त्याचा कर्मचाऱ्यांवरही ताण पडताना दिसत होता.

यातच वारंवार सर्व्हरडाऊन होत असल्यामुळे साऱ्यांनाच ताटकळत थांबावे लागत होते. निवडणुकीच्या कामामध्ये कर्मचारी व्यस्त होते. लोकसभेसाठी मतदान झाल्यानंतर एक दिवस विश्रांती घेऊन सर्वजण कामावर रुजू झाले आहेत, मात्र सर्व्हर डाऊन समस्या उद्भवत असल्याने सोमवारपासून नियमित कामकाजाला सुरुवात केली जाणार आहे, अशी माहिती महानगरपालिकेचे आरोग्य अधिकारी डॉ. संजीव नांद्रे यांनी दिली.

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.