सध्याच्या घडीला बेळगाव लोकसभा मतदार संघातील एकूण 6 रोड ओव्हर ब्रिजच्या (आरओबी) उभारणीला मंजुरी देण्यात आली आहे. तसेच सुधारित नव्या योजनेची अंमलबजावणी केली जाणार असल्यामुळे बेळगावच्या तिसऱ्या रेल्वे गेट येथील आरओबीच्या खानापूरच्या दिशेने जाणाऱ्या दोन मार्गांचे काम राज्य सरकारच्या सल्ल्यावरून थांबविण्यात आले आहे, अशी माहिती केंद्रीय रेल्वे, संपर्क, इलेक्ट्रॉनिक्स आणि माहिती तंत्रज्ञान खात्याचे मंत्री अश्विनी वैष्णव यांनी दिली आहे.
लोकसभेमध्ये बेळगावच्या खासदारांनी उपस्थित केलेल्या प्रश्नाला उत्तर देताना ते बोलत होते. बेळगाव लोकसभा मतदारसंघात आतापर्यंत किती रोड ओव्हर ब्रिज मंजूर झाले आहेत? आणि बेळगाव शहरातील एलसी नं. 381 (तिसरे रेल्वे गेट) येथील आरओबीच्या दुसऱ्या मार्गाच्या बांधकामाची सध्याची स्थिती आणि सुरू असलेले हे काम ठप्प का झाले आहे? असे दोन प्रश्न बेळगावच्या खासदारांनी लोकसभेत विचारले होते. या प्रश्नाला उत्तर देताना केंद्रीय रेल्वे, संपर्क, इलेक्ट्रॉनिक्स आणि माहिती तंत्रज्ञान खात्याचे मंत्री अश्विनी वैष्णव म्हणाले की सध्याच्या घडीला बेळगाव लोकसभा मतदारसंघांमध्ये 6 रोड ओव्हर ब्रिज उभारण्यास मंजुरी देण्यात आली असून जे सध्या नियोजन, निविदा आणि अंमलबजावणी अशा विविध टप्प्यावर आहेत.
बेळगाव शहरातील तिसऱ्या रेल्वे गेट येथील आरओबी उभारण्याच्या कामाला खर्च विभागणी तत्त्वावर मंजूर मिळाली आहे. हा चौपदरी मार्ग असणारा आरओबी दोन टप्प्यात बांधण्याचे नियोजन असून एकल घटक आधार तत्त्वावर रेल्वेने त्याचे काम सुरू केले आहे.
सदर आरओबीच्या दोन मार्गांचे बांधकाम गेल्या 12 ऑक्टोबर 2022 रोजी सुरू झाले. या आरओबीच्या बेळगावच्या दिशेने येणाऱ्या दोन मार्गांचे काम हाती घेण्यात आले. तथापि खानापूरच्या दिशेने जाणाऱ्या दोन मार्गांचे काम राज्य सरकारच्या सल्ल्यावरून थांबविण्यात आले आहे.
राज्य सरकारने यापूर्वीच मंजूर झालेल्या सदर आरओबीच्या जनरल एग्रीमेंट ड्रॉइंगमध्ये (जीएडी) कांही सुधारणा करण्याचा प्रस्ताव मांडला आहे. या सुधारित जीएडीचा व्यवहार्यता अहवाल तयार करण्याचे काम हाती घेण्यात आले आहे, असे रेल्वे मंत्री अश्विनी वैष्णव यांनी सांगितले.
