बेळगाव लाईव्ह : परंपरेनुसार अक्षययतृतीयेच्या मुहूर्ताव उद्या २३ एप्रिल रोजी शिवजयंती साजरी करण्यात येणार आहे. कर्नाटक विधानसभा निवडणुकीच्या पार्श्वभूमीवर आचारसंहिता लागू करण्यात आली असून शिवजयंती साजरी करण्यावरही काही निर्बंध घालण्यात आले आहेत. मात्र शिवजयंती सार्वजनिक पातळीवर साजरी करण्यावर बंधने घालण्यात आली असून वैयक्तिकरित्या शिवजयंती साजरी करण्यासाठी कोणतीही बंधने नाहीत.
२३ एप्रिल रोजी साजऱ्या केल्या जाणाऱ्या शिवजयंतीच्या निमित्ताने प्रत्येक शिवभक्ताने आपल्या घरासमोर छत्रपती शिवाजी महाराजांच्या मूर्तीची, प्रतिमेची प्रतिष्ठापना करून, घरावर भगवा ध्वज लावून मराठा समाजाचा अभिमान, स्वाभिमान आणि आत्मप्रतिष्ठा दर्शवावी, असे आवाहन सकल मराठा समाजाचे गुणवंत पाटील यांनी केले आहे.
आपला समाज एकसंघ राहावा यासाठी छत्रपती शिवाजी महाराजांनी प्रयत्न केले त्याचप्रमाणे आपणदेखील सर्वांनी एकत्र येऊन चांगल्या पद्धतीचे वातावरण तयार करण्यासाठी आगळीवेगळी शिवजयंतीची परंपरा जपावी,
या उपक्रमासंदर्भात आपल्या आसपास असलेल्या शिवभक्तांमध्ये जागृती करावी, याच उपक्रमाचा एक भाग म्हणून शिवचरित्राचे वाचन, श्रीमान योगी कादंबरीचे पठण करावे, आणि
यावर्षीच्या शिवजयंतीच्या माध्यमातून वातावरण निर्मिती करावी, असेही आवाहन सकल मराठा समाजाच्यावतीने करण्यात आले आहे.
